വാഗമൺ : വാഗമണ്ണില് ആരംഭിക്കുന്ന ഇന്ത്യയിലെ ഏറ്റവും വലിയ എയ്റോ സ്പോര്ട്സ് അഡ്വഞ്ചര് ഫെസ്റ്റിവലായ അന്താരാഷ്ട്ര പാരാഗ്ലൈഡിംഗ് ഫെസ്റ്റിവല് നാളെ (14) പൊതുമരാമത്ത്, വിനോദസഞ്ചാര വകുപ്പ് മന്ത്രി പി. എ മുഹമ്മദ് റിയാസ് ഉദ്ഘാടനം ചെയ്യും. വാഗമണ് അഡ്വഞ്ചര് പാര്ക്കില് നാല് മണിക്ക് നടക്കുന്ന ഉദ്ഘാടന ചടങ്ങില് ജലവിഭവ വകുപ്പ് മന്ത്രി റോഷി അഗസ്റ്റിന് അധ്യക്ഷത വഹിക്കും. 14 മുതല് 17 വരെയാണ് ഫെസ്റ്റിവല് അരങ്ങേറുക. വിനോദസഞ്ചാര വകുപ്പിന് കീഴിലുള്ള കേരള അഡ്വഞ്ചര് ടൂറിസം പ്രൊമോഷന് സൊസൈറ്റിയും (കെ.എ.ടി.പി.എസ്) ഇടുക്കി ജില്ലാ ടൂറിസം പ്രൊമോഷന് കൗണ്സിലും (ഡി.ടി.പി.സി) സംയുക്തമായി പാരാഗ്ലൈഡിംഗ് അസോസിയേഷന് ഓഫ് ഇന്ത്യയുടെ സാങ്കേതിക പിന്തുണയോടുകൂടിയാണ് ഫെസ്റ്റിവല് സംഘടിപ്പിക്കുന്നത്.
നൂറിലധികം അന്തര്ദേശീയ, ദേശീയ പ്രശസ്ത ഗ്ലൈഡര്മാര് ഫെസ്റ്റിവലില് പങ്കെടുക്കും. 15 ലധികം രാജ്യങ്ങള് ഈ സീസണില് പങ്കെടുക്കാന് താല്പ്പര്യം പ്രകടിപ്പിച്ചിട്ടുണ്ട്. കൂടാതെ ലോകപ്രശസ്ത റൈഡര്മാരും അന്താരാഷ്ട്ര ചാമ്പ്യന്മാരും പരിപാടിയില് പങ്കെടുക്കും. അമേരിക്ക, നേപ്പാള്, ഫ്രാന്സ്, ജര്മ്മനി, ഇറ്റലി, ന്യൂസിലാന്ഡ്, ഓസ്ട്രേലിയ, ബ്രിട്ടന് തുടങ്ങിയ രാജ്യങ്ങളും ഡല്ഹി, ഗോവ, മഹാരാഷ്ട്ര, ഹിമാചല്പ്രദേശ്, കര്ണാടക, തമിഴ്നാട് തുടങ്ങിയ സംസ്ഥാനങ്ങളില് നിന്നുള്ളവരും ഫെസ്റ്റിവലില് പങ്കെടുക്കും. ഉദ്ഘാടന പരിപാടിയില് ഡീന് കുര്യാക്കോസ് എം പി, എംഎല്എമാരായ എം.എം മണി, എ.രാജ, വാഴൂര് സോമന്, പി ജെ ജോസഫ്, പൂഞ്ഞാര് എംഎല്എ സെബാസ്റ്റ്യന് കുളത്തുങ്കല്, ജില്ലാ പഞ്ചായത്ത് പ്രസിഡന്റ് കെ.ടി ബിനു, ജില്ലാ കളക്ടര് ഷീബാ ജോര്ജ്, വിനോദസഞ്ചാര വകുപ്പ് ഡയറക്ടര് പി. ബി നൂഹ്, അഴുത ബ്ലോക്ക് പഞ്ചായത്ത് അംഗങ്ങള്, ഏലപ്പാറ ഗ്രാമപഞ്ചായത്ത് അംഗങ്ങള്, വകുപ്പ് ജീവനക്കാര്, വിവിധ സാമൂഹിക രാഷ്ട്രീയ പ്രതിനിധികള് തുടങ്ങിയവര് പങ്കെടുക്കും.
