പത്തനംതിട്ട: നഗരസഭകളിൽ നടക്കുന്ന അയ്യൻകാളി തൊഴിലുറപ്പ് പദ്ധതിയിൽ കാലോചിതമായ മാറ്റം വരുത്തണമെന്ന് ഐ.എൻ.ടി.യു.സി ജില്ലാ പ്രസിഡൻറ് ജ്യോതിഷ്കുമാർ മലയാലപ്പുഴ പറഞ്ഞു. അയ്യൻകാളി തൊഴിലുറപ്പ് തൊഴിലാളി കോൺഗ്രസ് യൂണിറ്റ് സമ്മേളനങ്ങളുടെ ജില്ലാതല ഉദ്ഘാടനം നിർവ്വഹിക്കുകയായിരുന്നു അദ്ദേഹം.
ഇവരുടെ വേതനം വർദ്ധിപ്പിക്കാൻ നടപടി സ്വീകരിക്കണം. ഇപ്പോൾ നാമമാത്രമായ തുകയാണ് തൊഴിലാളികൾക്ക് ലഭിക്കുന്നത്. സ്വകാര്യ വ്യക്തികളുടെ വസ്തുക്കളിൽ നടത്തുന്ന തൊഴിലുകൾക്ക് ആനുപാതികമായ ശമ്പളം നൽകണം. തൊഴിലാളികളെ ക്ഷേമനിധിയിൽ ഉൾപ്പെടുത്താൻ നടപടി വേണമെന്നും ജ്യോതിഷ് കുമാർ പറഞ്ഞു.
പല നഗരസഭകളിലും ജോലി ചെയ്തതിന്റെ വേതനം മാസങ്ങളായി നൽകാതെ കുടിശികയായി കിടക്കുകയാണ്. ഇത് അടിയന്തിരമായി കൊടുത്തു തീർക്കണം. ഡി.സി.സി വൈസ് പ്രസിഡൻറ് അഡ്വ.എ .സുരേഷ് കുമാർ അധ്യക്ഷത വഹിച്ചു. പികെ ഗോപി ,എം.സി.ഷെറീഫ് ,സി.കെ.അർജുനനൽ ,നാസർ തോണ്ടമണ്ണിൽ ,അജിത് മണ്ണിൽ ,പി.കെ. ഇക്ബാൽ തോട്ടുവ മുരളി ,എ.ഡി.ജോൺ ഫാത്തിമ ഹരികുമാർ പൂതങ്കര, ജയകുമാർ ,ആനന്ദൻ പിള്ള എന്നിവർ പ്രസംഗിച്ചു.