കുരുവട്ടൂർ : പോലൂർ തെക്കേമാരാത്ത് ബിജുവിന്റെ വീടിനുള്ളിൽ അനുഭവപ്പെടുന്ന മുഴക്കത്തെക്കുറിച്ച് അന്വേഷണസംഘം ബുധനാഴ്ച വിശദപരിശോധന നടത്തും. കേന്ദ്ര ഭൗമശാസ്ത്രപഠനകേന്ദ്രത്തിൽനിന്ന് വിരമിച്ച മുതിർന്ന ശാസ്ത്രജ്ഞനായ ഡോ.ജി.ശങ്കറിന്റെ നേതൃത്വത്തിലാണ് സംഘം പരിശോധന നടത്തുക. സംസ്ഥാന എമർജൻസി ഓപ്പറേഷൻ സെന്ററിലെ ഹസാർഡ് ആൻഡ് റിസ്ക് അനലിസ്റ്റ് ജി.എസ് പ്രദീപ്, ജിയോളജിയിലെ ആർ.എസ് അജിൻ എന്നിവരും ഒപ്പമുണ്ടാകും.
പ്രാഥമിക പരിശോധനയ്ക്കുശേഷം വിശദമായ പഠനങ്ങൾ ആവശ്യമുണ്ടോ എന്നുള്ള കാര്യം സംഘം വിലയിരുത്തി മന്ത്രിക്ക് റിപ്പോർട്ട് സമർപ്പിക്കും. മന്ത്രി എ.കെ ശശീന്ദ്രനും ജനപ്രതിനിധികളും ചൊവ്വാഴ്ച ബിജുവിന്റെ വീട് സന്ദർശിച്ചു. ഗ്രാമപ്പഞ്ചായത്ത് പ്രസിഡന്റ് എ.സരിത, സ്ഥിരംസമിതി ചെയർമാൻ യു.പി സോമനാഥൻ, ബ്ലോക്ക് പഞ്ചായത്ത് അംഗം എം.ജയപ്രകാശൻ, എം.കെ സുർജിത്ത് എന്നിവർ മന്ത്രിക്കൊപ്പമുണ്ടായിരുന്നു.
