തിരുവനന്തപുരം : ബംഗളൂരു – കന്യാകുമാരി ഐലന്‍ഡ് എക്‌സ്പ്രസിന്റെ ബോഗിയില്‍ തീപിടിത്തം. എസ്-വണ്‍ കോച്ചിന്റെ ബ്രേക്ക് ജാമായതാണ് തീപിടത്തമുണ്ടാകാന്‍ കാരണം. നേമം സ്റ്റേഷനില്‍ വെച്ച് ബോഗിയ്ക്ക് അടിയില്‍ നിന്ന് പുക ഉയരുന്നത് കണ്ട് യാത്രക്കാര്‍ ട്രെയിനിലെ ജീവനക്കാരെ വിവരം അറിയിക്കുകയായിരുന്നു. ഫയര്‍ഫോഴ്‌സും റെയില്‍വേ അധികൃതരും ചേര്‍ന്നാണ് തീ അണച്ചത്.
ബോഗിക്കുള്ളിലേക്ക് തീ പടരുന്നതിന് മുൻപ് അണയ്ക്കാൻ സാധിച്ചതിനാൽ വന്‍ ദുരന്തം ഒഴിവായി. തിരുവനന്തപുരത്തുനിന്ന് അഗ്‌നിരക്ഷാ സേന എത്തിയാണ് തീ അണച്ചത്. തീ അണച്ച ശേഷം ട്രെയിന്‍ യാത്ര തുടര്‍ന്നു.
