ന്യൂഡൽഹി: ഗൾഫ് രാജ്യങ്ങളിലെ ഇന്ത്യൻ തൊഴിലാളികളുടെ ശമ്പളത്തെ ഇന്ത്യയിലെ ആദായനികുതിയിൽ നിന്ന് ഒഴിവാക്കുന്നത് തുടരുമെന്ന് കേന്ദ്രധനമന്ത്രി നിർമ്മല സീതാരാമൻ. തൃണമൂൽ കോൺഗ്രസ് എം.പി മഹുവ മൊയ്ത്രയുടെ ട്വീറ്റ് ഉദ്ധരിച്ചുകൊണ്ടാണ് മന്ത്രി ഇക്കാര്യത്തിൽ വ്യക്തത വരുത്തിയത്.
2021 ലെ ധനകാര്യ നിയമഭേദഗതിയിൽ ഖത്തർ, സൗദി അറേബ്യ, യു.എ.ഇ, ഒമാൻ തുടങ്ങിയ ഗൾഫ് രാജ്യങ്ങളിലെ ഇന്ത്യൻ തൊഴിലാളികൾക്ക് പുതിയ നികുതിയോ അധിക നികുതിയോ ഏർപ്പെടുത്തിയിട്ടില്ലെന്ന് നിർമ്മല സീതാരാമൻ പറഞ്ഞു. വ്യക്തത ലഭിക്കുന്നതിനായി ആദായനികുതി നിയമത്തിൽ ‘നികുതി ബാധ്യത’ (Liable to tax) എന്ന വാക്കിന് പൊതുവായ നിർവ്വചനം ഉൾപ്പെടുത്തിയിട്ടുണ്ടെന്നും അവർ പറഞ്ഞു.
നിയമഭേദഗതിയിൽ ഗൾഫ് രാജ്യങ്ങളിലെ പ്രവാസി ഇന്ത്യക്കാരുടെ ശമ്പള വരുമാനത്തിന്റെ നികുതിയിൽ മാറ്റം വരുത്തിയിട്ടില്ല. ഗൾഫ് രാജ്യങ്ങളിലെ ശമ്പളത്തിന് ഇന്ത്യയിൽ ലഭിക്കുന്ന ആദായനികുതി ഇളവ് തുടരുമെന്നും ധനമന്ത്രിയുടെ ഓഫീസ് ട്വീറ്റ് ചെയ്തു.
