വസ്ത്രങ്ങളും ബെഡ്ഷീറ്റുകളും തലയണക്കവറുമൊക്കെ ദിവസവും അലക്കുന്ന നിരവധിപ്പേരുണ്ട്. എന്നാൽ വസ്ത്രങ്ങളുടെ ആയുസ്സിന് അത് എത്രമാത്രം നല്ലതാണെന്ന് ആരെങ്കിലും ആലോചിച്ചിട്ടുണ്ടോ ?. ദിവസവും വസ്ത്രങ്ങൾ അലക്കുന്നത് അതിന്റെ മൃദുത്വം നഷ്ടപ്പെടാൻ കാരണമാകും. നാം എപ്പോഴും അലക്കി നശിപ്പിക്കാൻ സാധ്യതയുള്ള ഏതാനും വസ്ത്രങ്ങളാണ് താഴെപ്പറയുന്നത്. ബാത്ത് ടവലുകൾ കല്ലിലടിച്ചു കഴുകുന്നത് തോർത്തിന്റെ മൃദുത്വം നശിപ്പിക്കുകയും അതിന്റെ നാരുകളെ പെട്ടന്ന് നശിപ്പിക്കുകയും ചെയ്യും. മൂന്നുനാലുതവണ ഉപയോഗിച്ചശേഷം മാത്രം ബാത്ത് ടവലുകൾ കഴുകുക. ഓരോ തവണ ഉപയോഗിച്ചശേഷവും അയയിലിട്ട് നല്ലതുപോലെ ഉണക്കിയെടുക്കുക പുതപ്പ് എപ്പോഴും കഴുകുന്നത് അതിന്റെ മൃദ്യുത്വം ഇല്ലാതാക്കുകയും പുതപ്പിൽ ചുരുണ്ടികൂടിയുറങ്ങാനുള്ള സുഖം നശിപ്പിക്കുകയും ചെയ്യും. മൂന്ന് മുതൽ നാല് ആഴ്ചകൾ വരെയാകുമ്പോൾ മാത്രം പുതപ്പുകൾ കഴുകിയാൽ മതി.
എല്ലാ ആഴ്ചയിലും ബെഡ്ഷീറ്റ് അലക്കുന്നത് അതിന്റെ ഉപയോഗകാലാവധി കുറച്ചേക്കും. മാസത്തിലൊരിക്കൽ കഴുകുന്നതാണ് ബെഡ്ഷീറ്റുകൾക്ക് നല്ലത്. ഏറ്റവും കട്ടി കുറഞ്ഞതും നാച്ചുറലുമായ ഡിറ്റർജന്റുകൾ മാത്രം ബെഡ്ഷീറ്റ് അലക്കാൻ ഉപയോഗിക്കുക. ഡെനിം ഉപയോഗിച്ചാണ് ജീൻസുണ്ടാക്കിയിരിക്കുന്നത്. അഞ്ച് മുതൽ പത്ത് തവണ വരെ ഉപയോഗിച്ചശേഷം മാത്രമേ ഡെനിം വസ്ത്രങ്ങൾ കഴുകാൻ പാടുള്ളൂ. എപ്പോഴും ഇത് കഴുകിയാൽ ഡെനിമിന്റെ ഫൈബറുകൾ മുഴുവൻ പെട്ടന്ന് ശോഷിച്ചുപോകും.
