ഇടുക്കി: ചിന്നക്കനാലിൽ നിന്ന് കാട് മാറ്റിയ അരിക്കൊമ്പൻ ഇപ്പോൾ സമൂഹ മാദ്ധ്യമങ്ങളിൽ ശ്രദ്ധേയനാണ്. കേരളത്തിൽ ഇത് ആദ്യമായിരിക്കും ഒരു കാട്ടനക്ക് ഇത്രയധികം ആരാധകരുണ്ടാകുന്നത്. അരിക്കൊമ്പനെ കാടുമാറ്റിയതിന് ശേഷമാണ് ആരാധകരുടെ എണ്ണത്തിന് കണക്കില്ലെന്ന് മനസ്സിലാകുന്നതും. അത്രയധികം റീൽസ് വീഡിയോകളാണ് അരിക്കൊമ്പന്റെതായി സമൂഹമാദ്ധ്യമങ്ങളിൽ പ്രചരിക്കുന്നത്. ഇപ്പോഴിതാ അരിക്കൊമ്പന്റെ ചിത്രം കയ്യിൽ പച്ചകുത്തി താരമായിരിക്കുകയാണ് ഒരു ആരാധകൻ.
അരിക്കൊമ്പനോടുള്ള ഇഷ്ടമാണ് യുവാവിനെ അരിക്കൊമ്പന്റെ ചിത്രം ടാറ്റു ചെയ്യുന്നതിലേയ്ക്ക് നയിച്ചത്. ഇടതുകൈയിൽ ടാറ്റു പതിപ്പിക്കുന്ന വീഡിയോ യുവാവ് തന്നെയാണ് സമൂഹ മാദ്ധ്യമങ്ങളിൽ പ്രചരിപ്പിച്ചത്. ‘അരിക്കൊമ്പനെ നമ്മൾ തിരിച്ച് കൊണ്ടുവന്നിരിക്കുകയാണ്. ചെറിയ വേദനയുണ്ടെങ്കിലും അരിക്കൊമ്പന് വേണ്ടി ഇതിനപ്പുറവും ചെയ്യും’ അരിക്കൊമ്പന്റെ ചിത്രം പച്ചകുത്തിയ യുവാവ് പറയുന്നു.
