റാന്നി : ഇട്ടിയപ്പാറ വൺവേയിൽ വാഹനം ഇടിച്ചു തകർന്ന ദിശാസൂചിക പുനഃസ്ഥാപിച്ചു. എന്നാല് വൺവേ തെറ്റിച്ച് ഓടുന്ന വാഹനങ്ങൾക്കെതിരെ നടപടിയെടുക്കാൻ ഇതുവരെ പൊലീസിനെ നിയോഗിച്ചിട്ടില്ല. പുനലൂർ–മൂവാറ്റുപുഴ പാതയിലെ കാവുങ്കൽപടിയിൽ നിന്നാണ് ഇട്ടിയപ്പാറ ടൗണിൽ വൺവേ തുടങ്ങുന്നത്. ഇവിടെ സ്ഥാപിച്ചിരുന്ന ദിശാസൂചികയാണ് വാഹനങ്ങൾ ഇടിച്ചു തകർത്തത്. റോട്ടറി ക്ലബ്ബിന്റെ സഹകരണത്തോടെ തകരാർ പരിഹരിച്ചാണ് പുനഃസ്ഥാപിച്ചത്.
ദിശാസൂചികയ്ക്കു മുന്നിലൂടെയാണ് വാഹനങ്ങൾ വൺവേ തെറ്റിച്ചോടുന്നത്. ബസുകൾ ഒഴികെ എല്ലാ വാഹനങ്ങളും നിയമ ലംഘനം നടത്തുന്നുണ്ട്. ഇടയ്ക്കിടെ പോലീസ് പരിശോധന നടത്തി പിഴ ഈടാക്കുന്നുണ്ട്. അവർ കാര്യമായ ഇടപെടൽ നടത്താത്തതു മൂലം ഇട്ടിയപ്പാറ ടൗണിലെ നിരത്തുകളിലൂടെ തലങ്ങും വിലങ്ങും വാഹനങ്ങൾ പായുന്നു. പൊലീസുകാരെ സേവനത്തിനു നിയോഗിച്ചാൽ മാത്രമേ ഇതിനു പരിഹാരം കാണാനാകൂ.
