ജമ്മു : ജമ്മു കശ്മീരിലെ അവന്തിപോരയിൽ സുരക്ഷാ സേനയുമായുണ്ടായ ഏറ്റുമുട്ടലിൽ രണ്ട് ഭീകരർ കൊല്ലപ്പെട്ടു. അവന്തിപോരയിലെ രാജ്പോറ പ്രദേശത്ത് ഭീകരർ ഒളിച്ചിരിക്കുന്നുണ്ടെന്ന രഹസ്യ വിവരത്തെ തുടർന്ന് സുരക്ഷാ സേന തിരച്ചിൽ നടത്തുന്നതിനിടെയാണ് ഏറ്റുമുട്ടലുണ്ടായത്. ജമ്മു കശ്മീരിലെ ത്രാൽ സ്വദേശിയായ ഷാഹിദ് റാതർ, ഷോപ്പിയാൻ സ്വദേശി ഉമർ യൂസുഫ് എന്നിവരാണ് ഏറ്റുമുട്ടലിൽ കൊല്ലപ്പെട്ടത്. സർക്കാർ ജീവനക്കാരന്റെയും ഒരു സ്ത്രീയുടെയും കൊലപാതകത്തിൽ ഷാഹിദിൻ പങ്കുണ്ടെന്ന് കശ്മീർ പോലീസ് പറഞ്ഞു. ഏറ്റുമുട്ടൽ പ്രദേശത്ത് നടത്തിയ തിരച്ചിലിൽ രണ്ട് എകെ 47 തോക്കുകളും നിർണായക രേഖകളും പിടിച്ചെടുത്തതായി കശ്മീർ ഐജി പി.വിജയ് കുമാർ പറഞ്ഞു.
