ആലുവ : കോണ്ഗ്രസിന്റെ രാജ്യസഭ സ്ഥാനാര്ത്ഥിയായി എ.ഐ.സി.സി പ്രഖ്യാപിച്ചതിനെ തുടര്ന്ന് ജെബി മേത്തര് ഹിഷാം ആലുവ നഗരസഭ വൈസ് ചെയര്മാന് സ്ഥാനവും കൗണ്സിലര് സ്ഥാനവും രാജിവെച്ചു. ഇന്നലെ രാവിലെ നഗരസഭ സെക്രട്ടറി മുഹമ്മദ് ഷാഫി മുമ്പാകെയാണ് രാജി സമര്പ്പിച്ചത്. 2010 മുതല് ആലുവ നഗരസഭയില് പുളിഞ്ചോട് 22 -ാം വാര്ഡില് നിന്നുള്ള കൗണ്സിലറാണ്. 2015 ജനറല് സീറ്റായിട്ടും മത്സരിച്ച് ജയിച്ചു. 2020ല് മൂന്നാം വട്ടവും ജയിച്ച ശേഷമാണ് വൈസ് ചെയര്പേഴ്സണായത്. ഇന്ന് നിയമസഭ സെക്രട്ടറി മുമ്പാകെ രാജ്യസഭ സ്ഥാനാര്ത്ഥി പത്രിക സമര്പ്പിക്കുന്നതിന് മുന്നോടിയായിട്ടാണ് കൗണ്സില് അംഗത്വം രാജിവെച്ചത്.
അന്വര് സാദത്ത് എം.എല്.എ, ഡി.സി.സി പ്രസിഡന്റ് മുഹമ്മദ് ഷിയാസ്, കെ.പി.സി.സി ജനറല് സെക്രട്ടറി ബി.എ. അബ്ദുള് മുത്തലിബ്, നഗരസഭ ചെയര്മാന് എം.ഒ. ജോണ്, എം.ടി. ജേക്കബ്, ഫാസില് ഹുസൈന്, ലത്തീഫ് പൂഴിത്തറ, ലിസ ജോണ്സണ്, ഷമ്മി സെബാസ്റ്റ്യന്, പി.പി. ജെയിംസ് എന്നിവരും ജെബി മേത്തറിനൊപ്പമുണ്ടായിരുന്നു. കൗണ്സിലര് സ്ഥാനം രാജിവെയ്ക്കുന്നതിന് മുന്നോടിയായി വാര്ഡിലെ വോട്ടര്മാരെ സന്ദര്ശിച്ച് നന്ദിയര്പ്പിച്ച് ജെബി മേത്തര് അനുഗ്രഹം വാങ്ങി.
