തിരുവനന്തപുരം: ഐ ഐ ടി, എൻ ഐ ടി ഉള്പ്പെടെ സാങ്കേതിക വിദ്യാഭ്യാസ സ്ഥാപനങ്ങളില് പ്രവേശനത്തിനുള്ള ജോയന്റ് എന്ട്രന്സ് എക്സാമിനേഷന് (മെയിന്) ആരംഭിച്ചു. കേന്ദ്രം ലഭ്യമാക്കിയ മാസ്ക്, സാനിറ്റൈസര് എന്നിവ ഉപയോഗിച്ചാണ് രാവിലെ 6.30ന് തന്നെ വിദ്യാർത്ഥികള് പരീക്ഷക്കെത്തിയത്.
രാജ്യത്തെ 605 കേന്ദ്രങ്ങളില് കമ്പ്യൂട്ടര് അധിഷ്ഠിതമായി നടത്തുന്ന പരീക്ഷ 8,58,273 വിദ്യാർത്ഥികളാണ് എഴുതുന്നത്. സംസ്ഥാനത്ത് 13 സിറ്റി കേന്ദ്രങ്ങളിലാണ് പരീക്ഷ നടക്കുന്നത്. ബി.ഇ/ബി.ടെക് കോഴ്സുകള്ക്ക് പുറമെ ബി.ആര്ക്ക്, ബി.പ്ലാനിങ് കോഴ്സുകള്ക്കുള്ള പ്രവേശന പരീക്ഷയും ഇതോടൊപ്പം നടക്കും. അഡ്മിറ്റ് കാര്ഡുകള് jeemain.nta.nic.in എന്ന വെബ്സൈറ്റിലൂടെ ലഭ്യമാക്കിയിരുന്നു.
അഡ്മിറ്റ് കാര്ഡിനൊപ്പം പരീക്ഷാർത്ഥികള്ക്കുള്ള കോവിഡ് സംബന്ധിച്ച നിര്ദേശങ്ങളും ഉള്ളടക്കം ചെയ്തിട്ടുണ്ട്. ജെ.ഇ.ഇ അഡ്വാന്സ്സ് പരീക്ഷ സെപ്റ്റംബര് 27നാണ്. കോവിഡ് വ്യാപന സാഹചര്യത്തില് ജെ.ഇ.ഇ, നീറ്റ് പരീക്ഷകള് മാറ്റിവെക്കണമെന്ന് പ്രതിപക്ഷ പാര്ട്ടികള് ആവശ്യപ്പെടുകയും സുപ്രീംകോടതിയെ സമീപിക്കുകയും ചെയ്തിരുന്നു. എന്നാല് പരീക്ഷ മാറ്റിവെക്കാനാകില്ലെന്ന നിലപാടാണ് കേന്ദ്രം സ്വീകരിച്ചത്.
