മലപ്പുറം: വിദേശ രാജ്യങ്ങളില് ജോലി വാഗ്ദാനം ചെയ്ത് ലക്ഷക്കണക്കിന് രൂപ തട്ടിയെടുത്ത കേസില് യുവാവിനെ മേലാറ്റൂര് പോലീസ് അറസ്റ്റ് ചെയ്തു. പട്ടിക്കാട് ചുങ്കത്ത് സൈന് ട്രാവല്സ് നടത്തിയിരുന്ന പാണ്ടിക്കാട് വളരാട് സ്വദേശി അരിവായില് മുഹമ്മദ് യൂസുഫ് ഇസാമാണ് (20) അറസ്റ്റിലായത്. 2019ലാണ് കേസിനാസ്പദമായ സംഭവം.
നൂറോളം പേരില്നിന്നായി 30,000വും അതിനു മുകളിലുമുള്ള സംഖ്യയും തട്ടിയെടുത്ത സംഭവത്തിലാണ് അറസ്റ്റ്. പണം നല്കിയവര് വിസ ലഭിക്കാത്തതിനെ തുടര്ന്ന് നല്കിയ പരാതികളില് മേലാറ്റൂര് പോലീസ് മൂന്ന് കേസുകള് രജിസ്റ്റര് ചെയ്തിരുന്നു. വയനാട്, കോഴിക്കോട് ജില്ലകളില് ഒളിവില് താമസിച്ചുവരുകയായിരുന്ന പ്രതി നാട്ടില് തിരിച്ചെത്തിയതായി രഹസ്യവിവരം ലഭിച്ചതിനെ തുടര്ന്ന് നടത്തിയ അന്വേഷണത്തിലാണ് ഇയാള് പിടിയിലായത്.
പ്രതിയെ പെരിന്തല്മണ്ണ കോടതിയില് ഹാജരാക്കി റിമാന്ഡ് ചെയ്തു. മേലാറ്റൂര് സി.ഐ കെ. റഫീഖ്, എസ്.ഐ മത്തായി, സി.പി.ഒമാരായ ഷൈജു, രാജീഷ്, അംബിക, ഷമീര് എന്നിവരുടെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.
