തൃശ്ശൂര് : ഹോങ്കോങ്ങില് ജോലി വാഗ്ദാനം ചെയ്ത് തട്ടിപ്പ് നടത്തിയതിന് തൃശൂര് സ്വദേശിക്കെതിരെ പരാതി. തൃശ്ശൂര് ആല്പ്പാറ സ്വദേശി സതീഷിനെതിരെയാണ് പരാതി. ഇയാള് 40 ഓളം പേരില് നിന്ന് ഒരു കോടിയിലധികം രൂപ തട്ടിയതായാണ് പരാതി. സംഭവത്തില് അന്വേഷണം ആവശ്യപ്പെട്ട് ഇവര് സിറ്റി പോലീസ് കമ്മീഷണര്ക്ക് പരാതി നല്കി.
പരാതിക്കാരനായ വിലങ്ങന്നൂര് സ്വദേശി ജോണ് പറയുന്നതിങ്ങനെ – തനിക്കും ഭാര്യയ്ക്കും ഹോങ്കോങ്ങില് ജോലി കിട്ടാനായി കഴിഞ്ഞ വര്ഷം ജൂണില് രണ്ട് ലക്ഷം രൂപയാണ് നല്കിയത്. മാര്ച്ച് മാസം യാത്രാ ടിക്കറ്റിനായും പണം നല്കി. ടിക്കറ്റും വീസയും നല്കാമെന്നേറ്റ ദിവസം മുതല് പണം വാങ്ങിയവരെക്കുറിച്ച് ഒരു വിവരവുമില്ല. ഫോണില് ബന്ധപ്പെടാന് ശ്രമിച്ചിട്ടും ഫലമില്ല.
ഹോങ്കോങ്ങ് ഇന്റര്നാഷണല് ടെര്മിനലില് ഷെഫ്, സൂപ്പര്വൈസര്, മെക്കാനിക് എന്നീ ജോലികള് നല്കാമെന്ന വാഗ്ദാനം നല്കിയാണ് തട്ടിപ്പ്. നേരത്തെ സതീഷും കൂട്ടരും ഹോംകോങ്ങിലേക്ക് 9 പേരെ കൊണ്ടുപോകുന്നതിനിടെ മക്കാവോയില് വെച്ച് യാത്ര അവസാനിപ്പിച്ചിരുന്നു. കൊവിഡ് സാഹചര്യം ചൂണ്ടിക്കാട്ടിയാണ് അന്ന് യാത്ര മുടങ്ങിയത്. ഈ 9 പേരെ കൊണ്ടു പോയതില് വിശ്വസിച്ചാണ് ബാക്കിയുള്ളവര് പണം നല്കിയത്. സംഭവത്തില് അന്വേഷിച്ച് തുടര്നടപടി സ്വീകരിക്കുമെന്ന് സിറ്റി പോലീസ് കമ്മീഷണര് വ്യക്തമാക്കി.
