തിരുവല്ല : രാജ്യത്തിനായുള്ള സമര്‍പ്പിത ജീവിതമാണ് മാര്‍ത്തോമ്മാ സഭ പരമാധ്യക്ഷന്‍ ഡോ.ജോസഫ് മാര്‍ത്തോമ്മാ മെത്രാപ്പോലീത്തയുടേതെന്ന് നരേന്ദ്ര മോദി. മെത്രാപ്പോലീത്തയുടെ നവതിയാഘോഷം വീഡിയോ കോണ്‍ഫറന്‍സിലൂടെ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. കോവിഡിനെ പ്രതിരോധിക്കുന്നതില്‍ രാജ്യമെടുത്ത തീരുമാനങ്ങളില്‍ ഇതുവരെ ലഭിച്ചത് ആശാവഹമായ ഫലങ്ങളാണ്.
ജാഗ്രത തുടരണമെന്നും രാജ്യത്തിന്റെ ഉന്നമനത്തിനായി സാമ്പത്തിക ഉത്തേജനത്തിന് കൂടുതല്‍ നടപടികള്‍ സ്വീകരിക്കുമെന്നും നരേന്ദ്ര മോദി പറഞ്ഞു. ഉദ്ഘാടനത്തിന് ശേഷം മറുപടി പ്രസംഗത്തില്‍ രാജ്യപുരോഗതിക്കായി നരേന്ദ്രമോദി നടത്തുന്ന എല്ലാ നല്ല പ്രവര്‍ത്തനങ്ങള്‍ക്കും സഭയുടെ പിന്തുണ ഉണ്ടാകുമെന്ന് ഡോ. ജോസഫ് മാര്‍ത്തോമ്മ മെത്രാപ്പോലീത്ത പറഞ്ഞു.
കോവിഡ് പ്രോട്ടോക്കോള്‍ പ്രകാരം തിരുവല്ല മാര്‍ത്തോമ്മാ ഓഡിറ്റോറിയത്തില്‍ രാവിലെ 11 മണിക്കായിരുന്നു ചടങ്ങുകള്‍. കര്‍ദ്ദിനാള്‍ ക്ലീമിസ് കത്തോലിക്കാ ബാവ, ഡോ.ഗീവര്‍ഗീസ് മാര്‍ തിയഡോഷ്യസ്, ഡോ. യൂഹാനോന്‍ മാര്‍ ക്രിസോസ്റ്റമോസ്, ബിഷപ് തോമസ് കെ.ഉമ്മന്‍, ഡോ. ജോസഫ് മാര്‍ ഗ്രിഗോറിയോസ്, ഡോ. ഉഷാ ടൈറ്റസ്, അക്കീരമണ്‍ കാളിദാസ ഭട്ടതിരി, സലിം സഖാഫി മൗലവി, സഭാ സെക്രട്ടറി റവ.കെ.ജി. ജോസഫ് , ആന്റാ ആന്റണി എം.പി, മാത്യു ടി. തോമസ് എം.എല്‍.എ, രാജ്യസഭ മുന്‍ ഉപാധ്യക്ഷന്‍ പ്രഫ. പി ജെ കുര്യന്‍, ജില്ലാ കലക്ടര്‍ പി.ബി. നൂഹ് തുടങ്ങിയവര്‍ സന്നിഹിതരായിരുന്നു.
വൈദിക ട്രസ്റ്റി റവ.തോമസ് കെ. അലക്സാണ്ടര്‍, അത്മായ ട്രസ്റ്റി പി.പി. അച്ഛന്‍ കുഞ്ഞ് എന്നിവര്‍ മംഗളപത്രം സമര്‍പ്പിച്ചു. മിസോറാം ഗവര്‍ണര്‍ പി.എസ്. ശ്രീധരന്‍ പിള്ളക്ക് വേണ്ടി ബി.ജെ.പി സംസ്ഥാന സമിതിയംഗം ടി.ആര്‍. അജിത് കുമാര്‍, ജില്ലാ സെല്‍ കോ- ഓര്‍ഡിനേറ്റര്‍ വിനോദ് തിരുമൂലപുരം എന്നിവര്‍ ചേര്‍ന്ന് ഉപഹാരം കൈമാറി. രാവിലെ എട്ടിന് പുലത്തീന്‍ ചാപ്പലില്‍ നടന്ന സ്‌തോത്ര ശ്രുശൂഷയോടും കുര്‍ബ്ബാനയോടും കൂടിയായിരുന്നു നവതി ആഘോഷ ചടങ്ങുകള്‍ക്ക് തുടക്കമായത്.
