​’തമാശയ്ക്കെന്ന്’ വിശദീകരണം ; ബോട്ട് ഗൈഡിനെ കടലിലേക്ക് തള്ളിയിട്ട് ഇസ്രയേലി വിനോദസഞ്ചാരി

ശ്രീലങ്ക: വിനോദ സഞ്ചാരത്തിനിടെ ബോട്ടിലുണ്ടായിരുന്ന പ്രാദേശിക ഗൈഡിനെ കടലിലേക്ക് തള്ളിയിട്ട് ഇസ്രയേൽ വിനോദ സഞ്ചാരികൾ. സംഭവത്തിന്‍റെ ദൃശ്യങ്ങൾ സമൂഹ മാധ്യമങ്ങളിൽ വൈറലായതോടെ ഇസ്രയേലി വിനോദ സഞ്ചാരികൾക്ക് നേരെ വ്യാപക വിമർശനം. എന്നാൽ, ഗൈഡിനെ കടലിലേക്ക് തള്ളിയിട്ടത് വെറുമൊരു തമാശയ്ക്കായിരുന്നുവെന്നും അയാൾക്ക് പരിക്കേറ്റിട്ടില്ലെന്നുമാണ് വിനോദ സഞ്ചാരികളുടെ വിശദീകരണം.

ഗൈഡിനെ തള്ളിയിട്ടത് നടുക്കടലിൽ!
കടലിലൂടെ ബോട്ടിൽ യാത്ര ചെയ്യുന്നതിനിടെ വെള്ളം കുടിച്ചുകൊണ്ടിരുന്ന ഗൈഡിനെ സംഘത്തിലുണ്ടായിരുന്ന ഒരാൾ പെട്ടെന്ന് വെള്ളത്തിലേക്ക് തള്ളിയിടുന്നത് സമൂഹ മാധ്യമങ്ങളിൽ വ്യാപകമായി പ്രചരിക്കുന്ന വീഡിയോകളിൽ കാണാം. ഈ സമയം മറ്റുള്ളവർ സംഭവം കണ്ട് ചിരിക്കുന്നതും തങ്ങളുടെ മൊബൈൽ ഫോണിൽ ദൃശ്യങ്ങൾ പകർത്തുന്നതും വീഡിയോയിൽ കാണാം. അതേസമയം സംഭവത്തിന്‍റെ കൃത്യമായ സ്ഥലമോ തീയതിയോ ഗൈഡിന്‍റെ വ്യക്തിവിവരങ്ങളോ ഇതുവരെ സ്ഥിരീകരിച്ചിട്ടില്ല.