ആലപ്പുഴ: കണ്ണൂരില് സിപിഎം വ്യാജ ആധാര് കാര്ഡുകള് നിര്മിക്കുന്നത് അന്വേഷിക്കണമെന്ന പരാതിയില് ഉറച്ചു നില്ക്കുന്നതായി എഐസിസി ജനറല് സെക്രട്ടറി കെ.സി.വേണുഗോപാല് എംപി. വ്യാജ ആധാര് കാര്ഡ് ആരോപണം പിന്വലിച്ച് മാപ്പുപറയണമെന്നാവശ്യപ്പെട്ട് സിപിഎം ജില്ലാ സെക്രട്ടറി അയച്ച വക്കീല് നോട്ടീസിനു മറുപടിയായാണ് കെ.സി, ഇക്കാര്യം വ്യക്തമാക്കിയത്. മുന് ഡയറക്ടര് ജനറല് ഓഫ് പ്രോസിക്യൂഷന്സ് അഡ്വ. ടി.ആസഫലി മുഖേനയാണ് കെ.സി.വേണുഗോപാല് നിലപാട് വ്യക്തമാക്കിയത്. കണ്ണൂര് ജില്ലയില് മുന്കാലങ്ങളില് വോട്ടര്പട്ടികയില് വ്യാപകമായി ക്രമക്കേട് നടത്തിയതിന്റെയും വന്തോതില് കള്ളവോട്ട് ചെയ്തതിന്റെയും മോശം ചരിത്രമുള്ള സിപിഎം, പയ്യന്നൂരിലെ മുന്പാര്ട്ടി നേതാവ് പി.വി.കുഞ്ഞിക്കൃഷ്ണന് ഉന്നയിച്ച ആരോപണങ്ങളില് നിന്നു ജനശ്രദ്ധ തിരിച്ചു വിടാനും ഇത്തവണത്തെ നിയമസഭാ തെരഞ്ഞെടുപ്പില് രാഷ്ട്രീയ നേട്ടമുണ്ടാക്കാനുമായി നടത്തുന്ന രാഷ്ട്രീയ തട്ടിപ്പാണ് തനിക്കെതിരായ നിയമനടപടിയെന്നും കെ.സി.വേണുഗോപാല് മറുപടിയില് പറഞ്ഞു.
1991ലെ നിയമസഭാ തെരഞ്ഞെടുപ്പില് കണ്ണൂരിലെ എടക്കാട് മണ്ഡലത്തില് നിന്നു മുതിര്ന്ന സിപിഎം നേതാവ് തെരഞ്ഞെടുക്കപ്പെട്ടത് കള്ളവോട്ടിന്റെ പിന്തുണയിലാണെന്നു കണ്ടെത്തി ഇലക്ഷന് ട്രിബ്യൂണല് അന്നത്തെ തെരഞ്ഞെടുപ്പുഫലം റദ്ദാക്കിയ സംഭവവും വേണുഗോപാല് ചൂണ്ടിക്കാട്ടി. കല്യാശ്ശേരി നിയമസഭാ മണ്ഡലത്തില് സ്ഥിരതാമസക്കാരായ നിരവധി വോട്ടര്മാരെ വിലാസത്തില് മാറ്റം വരുത്തി സിപിഎം പയ്യന്നൂരിലെ വോട്ടര്പട്ടികയില് തിരുകിക്കയറ്റിയിട്ടുണ്ടെന്നും, കള്ളവോട്ടിനു വേണ്ടി സിപിഎം പയ്യന്നൂര് ഏരിയാ കമ്മിറ്റി ഓഫീസ് കേന്ദ്രീകരിച്ചു വ്യാജ ആധാര് കാര്ഡ് നിര്മാണം നടക്കുന്നുണ്ടെന്നും പയ്യന്നൂരിലെ സ്ഥാനാര്ഥി കൂടിയായ കുഞ്ഞിക്കൃഷ്ണന് പരസ്യമായി മാധ്യമങ്ങളോട് വെളിപ്പെടുത്തിയിട്ടുള്ളതും അതു സംബന്ധിച്ച് അന്വേഷണം ആവശ്യപ്പെട്ട് തെരഞ്ഞെടുപ്പു കമ്മീഷന് പരാതി നല്കിയിട്ടുള്ളതുമാണ്. ഉത്തരവാദിത്തമുള്ളൊരു രാഷ്ട്രീയ പ്രവര്ത്തകനെന്ന നിലയില് അക്കാര്യം ബന്ധപ്പെട്ട അധികാരികളുടെ ശ്രദ്ധയില് പെടുത്തുക മാത്രമാണ് എഐസിസി ജനറല് സെക്രട്ടറിയായ താന് ചെയ്തത്. അത് തന്റെ കടമയുമാണ്-കെ.സി.വേണുഗോപാല് മറുപടി നോട്ടീസില് പറഞ്ഞു.
