ചെങ്ങന്നൂര് : എല്ലാ വിഭാഗം ജനങ്ങളേയും ദുരിതത്തിലാക്കുന്ന കെ-റെയില് സില്വര് ലൈന് പദ്ധതി സംസ്ഥാന സര്ക്കാര് ഉപേക്ഷിക്കണമെന്ന് മുന് നഗരസഭാ ചെയര്മാന് കെ.ഷിബുരാജന് ആവശ്യപ്പെട്ടു. താലൂക്കിലെ പദ്ധതി പ്രദേശങ്ങളിലെ ഏഴ് യൂണിറ്റ് കമ്മിറ്റികളുടെ നേതൃത്വത്തില് നടത്തിയ താലൂക്ക്തല ആര്ഡിഓഫീസ് മാര്ച്ചും ധര്ണ്ണയും ഉദ്ഘാടനം ചെയ്യുകയായിരുന്നു അദ്ദേഹം. ഗുരുതരമായ പാരിസ്ഥിതിക പ്രശ്നവും ജനങ്ങളുടെ സ്വെര്യയജീവിതത്തെ ബാധിക്കുകയും ചെയ്യുന്ന കെ-റെയില് പദ്ധതി സര്ക്കാര് ശരിയായ പഠനം നടത്തിയിരുന്നെങ്കില് എന്നേ ഉപേക്ഷിക്കുമായിരുന്നു എന്നും കെ.ഷിബുരാജന് പറഞ്ഞു.
കെ-റെയില് സില്വര് ലൈന് വിരുദ്ധ ജനകീയ സമിതി ജില്ലാ കണ്വീനര് മധു ചെങ്ങന്നൂര് അദ്ധ്യക്ഷത വഹിച്ചു. സംസ്ഥാന ജനറല് കണ്വീനര് എസ്.രാജീവന് മുഖ്യപ്രഭാഷണം നടത്തി. ജില്ലാ ജനറല് കണ്വീനര് കെ.ആര് ഓനമക്കുട്ടന്, പത്തനംതിട്ട ജില്ലാ കമ്മിറ്റിയംഗം എസ്.രാധാമണി, കെ.വിമല് ജി, എന്.ആര് ശ്രീധരന്പിള്ള, റ്റി.കോശി എന്നിവര് പ്രസംഗിച്ചു. നേരത്തെ കെ.എസ്.ആര്.ടി.സി ബസ് സ്റ്റാന്റ് പരിസരത്തു നിന്ന് ആരംഭിച്ച മാര്ച്ചില് പദ്ധതി പ്രദേശത്തെ സ്ത്രീകളടക്കം നിരവധിപേര് പങ്കെടുത്തിരുന്നു.
