ചെന്നൈ: കളരിയഭ്യാസിയായ തമിഴ്നാട് സ്വദേശി ഗിരിധരന്‍ (29) കുഴഞ്ഞുവീണ് മരിച്ചു. കളരിപ‍യറ്റ് ആയോധനപ്രകടനം നടത്തി നിമിഷങ്ങള്‍ക്കുള്ളിലാണ് മരണം. കഴിഞ്ഞ ആറുവര്‍ഷമായി ചെന്നൈയിലെ വല്‍സരവക്കാമില്‍ ‘കളരിയില്‍ ക്ഷത്രിയ’ എന്ന ആയോധനകല സ്ഥാപനം നടത്തുകയായിരുന്നു ഗിരിധരന്‍.
കുഴഞ്ഞുവീണ ഗിരിധരനെ ആശുപത്രിയിലെത്തിച്ചെങ്കിലും മരണം സംഭവിച്ചു. യൂട്യൂബ് ചാനലിന് അഭിമുഖം നല്‍കുന്നതിന്‍റെ ഭാഗമായി സങ്കീര്‍ണ്ണമായ അഭ്യാസമുറകളുടെ വീഡിയോ ചിത്രീകരിക്കുന്നതിനിടെ ദേഹാസ്വാസ്ഥ്യം അനുഭവപ്പെടുകയായിരുന്നു.
മൃതദേഹം പോസ്റ്റ്മോര്‍ട്ടത്തിനുശേഷം ബന്ധുക്കള്‍ക്ക് വിട്ടുനല്‍കി. യൂട്യൂബ് വീഡിയോക്ക് വേണ്ടി ഇദ്ദേഹം വിശ്രമമില്ലാതെ പരിശീലനം നടത്തിയിരുന്നുവത്രെ. എന്നാല്‍, ദേഹാസ്വാസ്ഥ്യം കാരണം ഷൂട്ടിങ് മാറ്റിവെക്കാന്‍ ആവശ്യപ്പെട്ടതിനെതുടര്‍ന്ന് അഭിമുഖം അഞ്ചുമിനുട്ടെ നീണ്ടിരുന്നുള്ളൂ എന്ന് ചാനല്‍ അസോസിയേറ്റ് അറിയിച്ചു.വിശദമായ പോസ്റ്റ്മോര്‍ട്ടം റിപ്പോര്‍ട്ടിനായി കാത്തിരിക്കുകയാണെന്നും കൂടുതല്‍ അന്വേഷണം നടത്തിവരികയാണെന്നും പോലീസ് അറിയിച്ചു.
