ആലപ്പുഴ: കായംകുളത്തെ എസ്.എഫ്.ഐ നേതാവ് നിഖില് തോമസിന്റെ വ്യാജ ബിരുദ സര്ട്ടിഫിക്കറ്റ് വിവാദത്തില് പ്രതികരണവുമായി കലിംഗ സര്വ്വകലാശാല. നിഖില് തോമസ് എന്ന വിദ്യാര്ത്ഥി സര്വകലാശാലയില് പഠിച്ചിട്ടില്ലെന്ന് കലിംഗ സര്വകലാശാലയുടെ വെളിപ്പെടുത്തല്. ഇക്കാര്യം പരിശോധിച്ചുവെന്ന് രജിസ്ട്രാര് പറഞ്ഞു. നിഖില് തോമസിനെതിരെ നിയമനടപടിയെടുക്കുമെന്ന് രജിസ്ട്രാര് സന്ദീപ് ഗാന്ധി വ്യക്തമാക്കി.
അതേസമയം നിഖില് തോമസ് 2017 മുതല് 2020 വരെ മൂന്ന് വര്ഷവും കായംകുളം എംഎസ്എം കോളേജില് പഠിച്ചിരുന്നുവെന്നും പരീക്ഷയെഴുതിയിരുന്നുവെന്നും കേരള സര്വകലാശാല വിസി മോഹന് കുന്നമ്മല് വ്യക്തമാക്കി. നിഖിലിന്റെ ഡിഗ്രി സര്ട്ടിഫിക്കറ്റ് പരിശോധിക്കാന് രജിസ്ട്രാറോട് ആവശ്യപ്പെട്ടിട്ടുണ്ട്. റായ്പൂരിലും കായംകുളത്തും എങ്ങനെ ഒരേ സമയം പഠിച്ചുവെന്നതില് സംശയങ്ങളുണ്ടെന്നും അദ്ദേഹം പറഞ്ഞു.
