ആലപ്പുഴ : ദേശീയപാതയിൽ കലവൂരിനു സമീപം ലോറികൾ കൂട്ടിയിടിച്ച് അപകടം. മറിഞ്ഞ ലോറിക്കടിയിൽപ്പെട്ട് ബൈക്ക് യാത്രികൻ മരിച്ചു. ഇന്നു പുലർച്ചെ നാലരയോടെയായിരുന്നു അപകടം. മുഹമ്മ പോലീസ് സ്റ്റേഷനു സമീപം താമസിക്കുന്ന ആര്യക്കര സ്വദേശി മണിയപ്പനാണ് മരിച്ചത്. നിയന്ത്രണം വിട്ട തമിഴ്നാട് റജിസ്ട്രേഷൻ ഗുഡ്സ് വണ്ടി മത്സ്യം കയറ്റിയെത്തിയ ഇൻസുലേറ്റഡ് വണ്ടിയുടെ പിന്നിലിടിക്കുകയായിരുന്നു.
മാർക്കറ്റിൽ നിന്ന് മീൻ കയറ്റി ദേശീയ പാതയിലേക്കു കയറാൻ നിന്ന ബൈക്ക് യാത്രികൻ മറിഞ്ഞ വാഹനത്തിനടിയിൽപ്പെട്ടാണ് മരിച്ചത്. ഇൻസുലേറ്റഡ് വാഹനത്തിൽ ലോഡുണ്ടായിരുന്നതിനാൽ ക്രെയിൻ എത്തിച്ചാണ് വാഹനം ഉയർത്തി മണിയപ്പനെ പുറത്തെടുത്തത്. തുടർന്ന് അഗ്നിരക്ഷാ സേനയുടെ ആംബുലൻസിൽ ആലപ്പുഴ മെഡിക്കൽ കോളജിൽ എത്തിച്ചെങ്കിലും ജീവൻ രക്ഷിക്കാനായില്ല.
