കന്യാകുമാരി : കേരള-തമിഴ്നാട് അതിര്ത്തിയായ കളിയിക്കാവിളയില് റേഷനരി കടത്തുന്നതിടെയുണ്ടായ ഏറ്റുമുട്ടലില് യുവാവിനെ കുത്തിക്കൊലപ്പെടുത്തുകയും മറ്റൊരാളെ വെട്ടി പരിക്കേല്പ്പിക്കുകയും ചെയ്ത സംഭവത്തില് മൂന്നുപേരെ പോലീസ് അറസ്റ്റു ചെയ്തു. കളിയിക്കാവിള പറയാടിവിള സ്വദേശി ഷിജിയെ (38) കൊലപ്പെടുത്തിയ സംഭവത്തിലാണ് മരുതന്കോട് സ്വദേശി ക്ലൈന് (26), കുളപ്പുറം സ്വദേശി ജസ്റ്റിന് ജോസഫ് രാജ് (38), മരയാപുരം സ്വദേശി മഹേന്ദ്രകുമാര് (48) എന്നിവര് പിടിയിലായത്. വെട്ടേറ്റ എസ്. ടി. മങ്കാട് സ്വദേശി അജിനാണ് (26) ആശുപത്രിയില് ചികിത്സയിലുള്ളത്.
സംഭവത്തെക്കുറിച്ച് പോലീസ് പറയുന്നത് ഇങ്ങനെ, മാര്ച്ച് 26ന് രാത്രി 10ന് അജിനും ഷിജിയും കാറില് ഒരു ടണ് റേഷനരി തമിഴ്നാട്ടില് നിന്ന് കേരളത്തിലേക്ക് കടത്തിക്കൊണ്ടുവരുമ്പോള് കളിയിക്കാവിളയ്ക്ക് സമീപത്തുവെച്ച് ഏഴംഗസംഘം കാര് തടഞ്ഞുനിര്ത്തി രണ്ടുപേരെയും കത്തി കൊണ്ട് കുത്തുകയും അരിവാള് കൊണ്ട് വെട്ടിപ്പരിക്കേല്പിക്കുകയുമായിരുന്നു. അജിന് തോളിലും തലയിലുമാണ് വെട്ടേറ്റത്. ഷിജിക്ക് വയറിലും കഴുത്തിലും കുത്തേറ്റു. നിലവിളികേട്ട് നാട്ടുകാരെത്തിയപ്പോഴേക്കും അക്രമിസംഘം രക്ഷപെട്ടു.
അബോധാവസ്ഥയില് കിടന്ന രണ്ടുപേരയും നാട്ടുകാര് നാഗര്കോവില് മെഡിക്കല് കോളേജ് ആശുപത്രിയിലെത്തിച്ചു. ചികിത്സയിലിരിക്കെ ഏപ്രില് മൂന്നിന് രാത്രിയാണ് ഷിജി മരിച്ചത്. ജില്ലാ പോലീസ് മേധാവി ഹരി കിരണ് പ്രസാദിന്റെ നിര്ദ്ദേശപ്രകാരം കളിയിക്കാവിള ഇന്സ്പെക്ടര് എഴിലരസിയുടെ നേതൃത്വത്തില് മൂന്ന് പ്രത്യേക സംഘങ്ങള് അന്വേഷണം നടത്തുന്നതിനിടെയാണ് കഴിഞ്ഞ ദിവസം രാത്രി തക്കല ഡിവൈ.എസ്.പി ഗണേശന്റെ ഓഫീസിലെത്തി പ്രതികള് കീഴടങ്ങിയത്. റേഷനരി കേരളത്തിലേക്ക് കൊണ്ടുവരുന്നതിലുണ്ടായ തര്ക്കം കാരണമാണ് ഏറ്റുമുട്ടലുണ്ടായതെന്ന് കളിയിക്കാവിള പൊലീസ് ചോദ്യം ചെയ്തപ്പോള് പ്രതികള് സമ്മതിച്ചു. പ്രതികളെ റിമാന്ഡ് ചെയ്തു.
