പത്തനംതിട്ട : സിപിഐ പത്തനംതിട്ട ജില്ലാ സമ്മേളനത്തില് മുതിര്ന്ന നേതാക്കള്ക്കെതിരെ കടുത്ത വിമര്ശം.മുഖ്യമന്ത്രി പിണറായി വിജയന്റെ അടിമയെ പോലെയാണ് സിപിഐ സെക്രട്ടറി കാനം രാജേന്ദ്രന് പ്രവര്ത്തിക്കുന്നതെന്നാണ് സമ്മേളനത്തിലുയര്ന്ന പ്രധാന വിമര്ശനം.തെറ്റുകള് വരുത്തുമ്പോഴും സംസ്ഥാന സര്ക്കാറിനെ ന്യായീകരിക്കാനാണ് സിപിഐ സെക്രട്ടറി ശ്രമിക്കുന്നതെന്നും തെറ്റായ വിഷയങ്ങളില് എതിര് ശബ്ദങ്ങളോ വിമര്ശനങ്ങളോ ഉന്നയിക്കാന് സെക്രട്ടറി തയ്യാറാകുന്നില്ലെന്നും ജില്ലാ സമ്മേളനത്തില് പ്രതിനിധികള് തുറന്നടിച്ചു.
മുന് എംഎല്എ എല്ദോ എബ്രഹാമിനെ പോലീസ് മര്ദ്ദിച്ചപ്പോഴടക്കം പാര്ട്ടി സെക്രട്ടറിയുടെ പ്രതികരണം ഞെട്ടിക്കുന്നതായിരുന്നുവെന്നും പ്രതിനിധികള് വിമര്ശിക്കുന്നു.മന്ത്രി വീണാ ജോര്ജിനെതിരെയും സിപിഐ പത്തനംതിട്ട ജില്ലാ സമ്മേളനത്തില് രൂക്ഷ വിമര്ശനമാണ് ഉയര്ന്നത്. ഒരു ഇടതുപക്ഷ മുന്നണിക്ക് ചേരുന്നതല്ല മന്ത്രി വീണാ ജോര്ജിന്റെ പ്രവര്ത്തനങ്ങളും പെരുമാറ്റവുമെന്നാണ് സിപിഐ നേതാക്കള് കുറ്റപ്പെടുത്തുന്നത്. ആരോഗ്യവകുപ്പിനെ നിയന്ത്രിക്കാന് മന്ത്രിക്ക് കഴിയുന്നില്ലെന്നും മുന് മന്ത്രി കെ കെ ശൈലജയുടെ കാലത്തെ നല്ല പേരും പ്രവര്ത്തനങ്ങളിലെ മികവും രണ്ടാം ഇടത് സര്ക്കാരില് വീണ ജോര്ജ് ഇല്ലാതാക്കിയെന്നും പ്രതിനിധികള് കുറ്റപ്പെടുത്തുന്നു.
ഡെപ്യൂട്ടി സ്പീക്കര് ചിറ്റയം ഗോപകുമാറും വീണ ജോര്ജും തമ്മിലുള്ള പ്രശ്നം മുന്നണിക്ക് തന്നെ നാണക്കേട് ഉണ്ടാക്കി. മന്ത്രിയുടെ പിടിവാശിയാണ് പ്രശ്നങ്ങള് രൂക്ഷമാക്കിയതെന്നാണ് സംഘടനാ റിപ്പോര്ട്ടിലെ പരാമര്ശം. മന്ത്രി ഫോണുകളെടുക്കുന്നില്ലെന്ന നേരത്തെ ഉയര്ന്ന വിമര്ശനം, ജില്ലാ സമ്മേളനത്തിലും സിപിഐ ആവര്ത്തിച്ചു. ഫോണ് അലര്ജിയുള്ള മന്ത്രി, ഇടത് മുന്നണിക്ക് തന്നെ അപമാനമാണെന്നും സംഘടനാ റിപ്പോര്ട്ടിലുണ്ട്.