കണ്ണൂര്: കണ്ണൂര് താഴെചൊവ്വയില് കള്ളവോട്ട് ചെയ്തയാള് പിടിയില്. വലിയന്നൂര് സ്വദേശി ശശീന്ദ്രനെയാണ് പോലീസ് കസ്റ്റഡിയില് എടുത്തത്. താഴെചൊവ്വ എല്പി സ്കൂളില് ബുത്ത് നമ്ബര് 73-ലാണ് കള്ളവോട്ട് നടന്നത്. പ്രിസൈഡിംഗ് ഓഫിസറുടെ പരാതിയിലായിരുന്നു പോലീസിന്റെ നടപടി. താഴെചൊവ്വ സ്വദേശിയായ മറ്റൊരു ശശീന്ദ്രന് പകരമാണ് കസ്റ്റഡിയിലായ ആള് വോട്ട് രേഖപ്പെടുത്തിയത്.
വലിയന്നൂര് സ്വദേശിയായ ശശീന്ദ്രന് കിലോമീറ്ററുകള് അകലെയുള്ള താഴെചൊവ്വയില് വോട്ട് ചെയ്യാന് എത്തുകയായിരുന്നു. തിരിച്ചറിയല് രേഖയുമായി എത്തിയ ഇയാള് മറ്റൊരാള് ആണെന്ന് തിരിച്ചറിഞ്ഞതിന് പിന്നാലെയാണ് പ്രിസൈഡിംഗ് ഓഫിസര് പോലീസിനെ സമീപിച്ചത്. ഇയാള്ക്ക് ഏതെങ്കിലും രാഷ്ട്രീയപാര്ട്ടിയുമായി ബന്ധമുണ്ടോ തുടങ്ങിയ കാര്യങ്ങള് അറിവായിട്ടില്ല. ഇയാള് വോട്ട് ചെയ്തുവെന്ന് പോലീസും സ്ഥിരീകരിച്ചുവെന്നാണ് റിപ്പോര്ട്ട്.
