വീരാജ്പേട്ട: കര്ണാടകയിലെ കുടകില് ആയിരത്തിലധികം ഹോംസ്റ്റേകളില് 300 എണ്ണത്തിന് മാത്രമേ അനുമതിപത്രവും പഞ്ചായത്ത് ലൈസന്സുകളുമുള്ളൂ. മിക്ക ഹോംസ്റ്റേകളും പഞ്ചായത്തിലും ടൂറിസം വകുപ്പുകളിലും അപേക്ഷ നല്കി അനുമതിക്കുവേണ്ടി കാത്തിരിക്കുകയണ്. എന്നാല്, ഇവ ലൈസന്സിന് കാത്തിരിക്കാതെ ഓണ്ലൈന് വഴിയും ഏജന്സികള് വഴിയും ബുക്കിങ് എടുത്തുകൊണ്ടിരിക്കുകയാണെന്ന് പറയുന്നു.
ജില്ല ഭരണകൂടം ഇത്തരത്തില് പ്രവര്ത്തിക്കുന്ന ഹോംസ്റ്റേകളുടെ വിവരങ്ങള് ശേഖരിക്കാന് തഹസില്ദാര്മാരുടെ നേതൃത്വത്തില് സംഘത്തെ നിയമിച്ചു. റിപ്പോര്ട്ടിന്റെ അടിസ്ഥാനത്തില് നടപടി സ്വീകരിക്കുമെന്ന് ജില്ല കലക്ടര് ആനീസ് കണ്മണി ജോയ് അറിയിച്ചു.
മാര്ച്ച് മുതല് ഒക്ടോബര് വരെ ഹോംസ്റ്റേകള് അടച്ചിടുകയായിരുന്നു. കഴിഞ്ഞമാസം മുതല് ഹോംസ്റ്റേകള് തുറന്ന് പ്രവര്ത്തിക്കാന് തുടങ്ങിയതിന് ശേഷമാണ് ജില്ല ഭരണകൂടം നടപടിക്ക് ഒരുങ്ങുന്നത്. ഇക്കാര്യത്തില് കടുത്ത നടപടി വേണ്ടിവരുമെന്ന് ടൂറിസം അസി. ഡയറക്ടര് എം. രാഘവേന്ദ്രയും പറഞ്ഞു.