കാസര്കോട്: കര്ണാടകയുടെ അതിര്ത്തി നിയന്ത്രണത്തെ തുടര്ന്ന് ചികിത്സ കിട്ടാതെ രണ്ട് പേര് കൂടി മരിച്ചു. കര്ണ്ണാടകം അതിര്ത്തി തുറക്കാന് തയ്യാറാകാത്ത സാഹചര്യത്തിലാണ് രണ്ട് ജീവനുകള് കൂടി നഷ്ടമായത്. മഞ്ചേശ്വരം തുമിനാട് സ്വദേശി മാധവന്, കുഞ്ചത്തൂര് സ്വദേശി ആയിഷ എന്നിവരാണ് മരിച്ചത്.
അതിര്ത്തിപ്രദേശമായ തലപ്പാടിക്ക് അടുത്തുള്ളവരാണ് ഇരുവരും. മംഗലാപുരത്തേക്കുള്ള അതിര്ത്തി അടച്ചതിനാല് താരതമ്യേന അധികം ദൂരമുള്ള കാഞ്ഞങ്ങാട് ജില്ലാ ആശുപത്രിയിലേക്കാണ് മാധവനെ കൊണ്ടുപോയത്. വഴിമധ്യേ ആംബുലന്സില് വച്ച് വൈകിട്ട് 5.15 ഓടെയായിരുന്നു മാധവന്റെ മരണം.
ആയിഷയെ അത്യാസന്ന നിലയില് ഉപ്പളയിലെ സ്വകാര്യ ആശുപത്രിയില് പ്രവേശിപ്പിച്ചു. എന്നാല് നില അതീവ ഗുരുതരമായതിനാല് ഇവരെ മംഗലാപുരത്തേക്ക് കൊണ്ടുപോകണമെന്ന് ആശുപത്രി അധികൃതര് നിര്ദ്ദേശിച്ചു. ഇത് സാധ്യമല്ലാത്തതിനാല് ഇവരെയും കാഞ്ഞങ്ങാട് ജില്ലാ ആശുപത്രിയിലേക്ക് കൊണ്ടുപോയി. വഴിമധ്യേ ഉദുമയില് വച്ചാണ് മരണം സംഭവിച്ചത്. കാറിലായിരുന്നു ആയിഷയെ കാഞ്ഞങ്ങാടേക്ക് കൊണ്ടുപോയത്. 5.30 യോടെയാണ് മരണം.
