കോഴിക്കോട് : മലബാറിലേക്കുള്ള യാത്രക്കാർക്ക് ആശ്വാസമായി ബെംഗളൂരു കെംപെഗൗഡ അന്താരാഷ്ട്ര വിമാനത്താവളത്തിൽ നിന്ന് കോഴിക്കോട്ടേക്ക് നേരിട്ടുള്ള കർണാടക ആർടിസി (KSRTC) ഫ്ലൈ ബസ് സർവീസ് ആരംഭിക്കുന്നു. സ്വാതന്ത്ര്യദിന സമ്മാനമായി ആഗസ്റ്റ് 15 മുതൽ സർവീസ് ആരംഭിക്കുമെന്ന് കർണാടക സ്റ്റേറ്റ് റോഡ് ട്രാൻസ്പോർട്ട് കോർപറേഷൻ അറിയിച്ചു. ബെംഗളൂരു വിമാനത്താവളത്തിലെ ടെർമിനൽ-1ൽ നിന്ന് രാത്രി 10.40ന് പുറപ്പെടുന്ന ബസ്, ടെർമിനൽ-2ൽ നിന്ന് രാത്രി 10.45ന് യാത്രക്കാരെ കയറ്റിയ ശേഷം കോഴിക്കോട്ടേക്ക് തിരിക്കും. പിറ്റേന്ന് രാവിലെ 7.15ന് കോഴിക്കോട് എത്തും. കോഴിക്കോടുനിന്നുള്ള മടക്കസർവീസ് രാത്രി 7.30ന് ആരംഭിച്ച് പിറ്റേന്ന് പുലർച്ചെ 5.15ന് ബെംഗളൂരു വിമാനത്താവളത്തിലെത്തും.
41 സീറ്റുകളുള്ള സെമി-സ്ലീപ്പർ എസി ബസാണ് സർവീസിനായി ഉപയോഗിക്കുന്നത്. ബെംഗളൂരു നഗരത്തിലെ നയന്ദഹള്ളി മെട്രോ സ്റ്റേഷൻ, മൈസൂരു, ഹുൻസൂർ, ഗോണികോപ്പ, കുട്ട, മാനന്തവാടി, കൽപറ്റ, താമരശ്ശേരി എന്നിവിടങ്ങളിലായിരിക്കും പ്രധാന സ്റ്റോപ്പുകൾ. ബെംഗളൂരു വിമാനത്താവളത്തിൽ നിന്ന് കോഴിക്കോട്ടേക്കുള്ള ടിക്കറ്റ് നിരക്ക് 1,550 രൂപയാണ്. ടിക്കറ്റുകൾ www.ksrtc.in എന്ന വെബ്സൈറ്റ് വഴി ഓൺലൈനായി ബുക്ക് ചെയ്യാമെന്ന് കർണാടക ആർടിസി അറിയിച്ചു.
