തൃശൂര് : കരുവന്നൂര് വായ്പാ തട്ടിപ്പിനെതിരെ ഒറ്റയാള് സമരം നടത്തിയ അംഗത്തെ സി.പി.എം പുറത്താക്കി. മുന് ബ്രാഞ്ച് സെക്രട്ടറി സുജേഷ് കണ്ണാട്ടിനെയാണ് പ്രാഥമിക അംഗത്വത്തില് നിന്ന് ഒഴിവാക്കിയത്. സി.പി.എം പൊറത്തിശ്ശേരി സൗത്ത് എല്.സി യുടേതാണ് നടപടി. അതേസമയം, വായ്പ തട്ടിപ്പില് കൂടുതല് തെളിവുകള് ക്രൈംബ്രാഞ്ചിന് ലഭിച്ചു.
ഒരേ ആധാരത്തില് രണ്ടിലധികം വായ്പകള് നിരവധി പേര്ക്ക് അനുവദിച്ചതായി അന്വേഷണ സംഘം കണ്ടെത്തി. പ്രതികളുടേയും കുടുംബാംഗങ്ങളുടേയും പേരില് പത്ത് വായ്പകള് അനധികൃതമായി അനുവദിച്ചതായും കണ്ടെത്തി. ഒരേ ആധാരത്തിന് പേര് രണ്ടിലധികം വായ്പകള് നല്കിയിരിക്കുന്നത് 24 പേര്ക്കാണ്. ഇതില് 10 വായ്പകള് പ്രതികളുടെയും കുടുംബാംഗങ്ങളുടെയും പേരില്. ഒരാള്ക്ക് 50 ലക്ഷത്തിന് മുകളില് വായ്പ നല്കാനാകില്ലെന്ന നിയമവും ലംഘിച്ചു. 11 പേര്ക്കാണ് 50 ലക്ഷത്തിന് മുകളില് വായ്പ നല്കിയത്. ഇത് തിരിച്ചു പിടിക്കാന് നടപടിയുണ്ടായില്ല.
മൂന്ന് കോടി രൂപ പ്രതികള് തരപ്പെടുത്തിയത് ബാങ്ക് ഭരണസമിതി അംഗങ്ങളുടെ വ്യാജ ഒപ്പിട്ടാണ്. ഈ ഇടപാടിലാണ് വ്യാജ രേഖ ചമച്ചതിന് ക്രൈംബ്രാഞ്ച് കേസെടുത്തിട്ടുള്ളത്. പ്രതികളുടെ വീടുകളില് നിന്ന് കണ്ടെടുത്ത ലാപ്ടോപ്പുകള് ഫൊറന്സിക് വിദഗ്ധരുടെ സാന്നിധ്യത്തില് ക്രൈംബ്രാഞ്ച് പരിശോധിച്ച് വരികയാണ്. ബന്ധുക്കളുടെ പേരില് പ്രതികള് നടത്തിയ ഭൂമി ഇടപാടുകള്, സാമ്പത്തിക തിരിമറികള് തുടങ്ങിയവ എല്ലാം ക്രൈംബ്രാഞ്ചിന്റെ അന്വേഷണ പരിധിയിലാണ്.
