കാസര്ഗോഡ് : കാസര്ഗോഡ് ജില്ലയില് 24 പേര് കൂടി രോഗം ഭേദമായി ആശുപത്രികളില് നിന്നും വീടുകളിലേക്ക് മടങ്ങി. ഇതോടെ ജില്ലയില് രോഗം ഭേദമാവുന്നവരുടെ എണ്ണം 107 ആയി. മാര്ച്ച് 19ന് ദുബായില് നിന്നും നാട്ടിലെത്തിയ 20കാരന് കൂടി കൊവിഡ് 19 സ്ഥിരീകരിച്ചു. ജില്ലയില് ഇതുവരെ കൊവിഡ് 19 സ്ഥിരീകരിച്ച 168 കേസുകളില് ഇനി ചികിത്സയിലുള്ളത് 61 പേരാണ്
കാസര്ഗോഡ് ജില്ലയില് കഴിഞ്ഞ ഒരാഴ്ചക്കിടെ റിപ്പോര്ട്ട് ചെയ്തത് 7 കൊവിഡ് പോസിറ്റീവ് കേസുകള് മാത്രം. ഇതില് മൂന്ന് ദിവസം പുതുതായി ഒരു പോസിറ്റീവ് കേസും റിപ്പോര്ട്ട് ചെയ്തിട്ടില്ല. മറ്റ് രണ്ട് ദിവസങ്ങളില് ഓരോ കേസുകളാണ് റിപ്പോര്ട്ട് ചെയ്തത്. അതേസമയം കഴിഞ്ഞ ഒരാഴ്ചക്കിടെ ജില്ലയില് 100 പേര് രോഗം ഭേദമായി ആശുപത്രി വിട്ടു.
കൊവിഡ് ആശുപത്രിയായി പ്രവര്ത്തനം തുടങ്ങിയ കാസര്ഗോഡ് മെഡിക്കല് കോളജില് ചികിത്സയിലുണ്ടായിരുന്ന അഞ്ച് പേരും ജനറല് ആശുപത്രിയില് നിന്നും 16 പേരും ജില്ലാ ആശുപത്രിയില് നിന്നും മൂന്ന് പേരുമാണ് രോഗം ഭേദമായി വീട്ടിലേക്ക് മടങ്ങിയത്. ഇവര് 14 ദിവസം കൂടി വീടുകളില് നിരീക്ഷണത്തില് കഴിയണം.
കാസര്ഗോഡ് ജില്ലയില് ഇത് വരെ റിപ്പോര്ട്ട് ചെയ്ത 168 പോസിറ്റീവ് കേസുകളില് 103 എണ്ണം വിദേശ രാജ്യങ്ങളില് നിന്നും നാട്ടിലെത്തിയവരും 65 എണ്ണം സമ്പര്ക്ക പട്ടികയിലുള്ളവരുമാണ്. രോഗം ഭേദമായവരില് 75 പേര് വിദേശത്തു നിന്നും നാട്ടിലേത്തിയവരും 32 പേര് സമ്പര്ക്ക പട്ടികയിലുള്ളവരുമാണ്. കൊവിഡ് 19 സമൂഹ വ്യാപന സാധ്യത വിലയിരുത്താനായി ജില്ലയില് ആരംഭിച്ച സര്വ്വേ പുരോഗമിക്കുന്നു. കൊവിഡ് 19 റിപ്പോര്ട്ട് ചെയ്ത പഞ്ചായത്തുകളും നഗരസഭകളും കേന്ദ്രീകരിച്ചാണ് സര്വ്വേ. 2951 വീടുകളില് നേരിട്ടെത്തി ആരോഗ്യ പ്രവര്ത്തകര് വിവരങ്ങള് ശേഖരിച്ചു. സമ്പര്ക്ക പട്ടികയിലുള്ള രോഗലക്ഷണങ്ങള് ഇല്ലാത്ത 16 പേരെയും സമ്പര്ക്ക പട്ടികയിലില്ലാത്ത രോഗലക്ഷണങ്ങള് പ്രകടിപ്പിക്കുന്ന 71 പേരെയും സാമ്പിള് പരിശോധനക്കായി നിര്ദ്ദേശിച്ചു.
