ന്യൂഡല്ഹി: ഉത്തര്പ്രദേശിലെ ലളിതാഘട്ടിനെ കാശി വിശ്വനാഥ് ക്ഷേത്ര പരിസരത്തുള്ള മന്ദിര് ചൗക്കുമായി ബന്ധിപ്പിക്കുന്ന കാശി -വിശ്വനാഥ ഇടനാഴി പ്രധാനമന്ത്രി നരേന്ദ്രമോദി ഉദ്ഘാടനം ചെയ്തു. 39 കോടി ചിലവിലാണ് ഇടനാഴിയുടെ നിര്മാണം. ഉദ്ഘാടനത്തിന് മുമ്പ് പ്രധാനമന്ത്രി കാശി വിശ്വനാഥ് ക്ഷേത്രത്തില് പ്രാര്ഥന നടത്തുകയും ചെയ്തു. ഉത്തര്പ്രദേശ് വാരാണസിയിലെ കാശി വിശ്വനാഥ് ഇടനാഴിയുടെ ഉദ്ഘാടനത്തിന് മുന്നോടിയായി നരേന്ദ്രമോദി ഗംഗയില് പുണ്യസ്നാനം നടത്തിയിരുന്നു. മോദി ഗംഗയില് പുണ്യസ്നാനം ചെയ്യുന്ന വീഡിയോ സമൂഹമാധ്യമങ്ങളില് വൈറലായി.
വാരാണസിയില് മോദിയെ സ്വീകരിക്കാനായി ബി.ജെ.പി പ്രവര്ത്തകര് ഉള്പ്പെടെ തടിച്ചു കൂടിയിരുന്നു. വഴികളില് പുഷ്പാര്ച്ചന നടത്തിയാണ് മോദിയെ സ്വീകരിച്ചത്. രണ്ടു ദിവസമാണ് മോദിയുടെ വാരാണസി സന്ദര്ശനം. കാശി -വിശ്വനാഥ് പദ്ധതി ഉദ്ഘാടനമാണ് ഇതില് പ്രധാനം. 2019 മാര്ച്ച് എട്ടിനാണ് മോദി പദ്ധതിക്ക് തറക്കല്ലിട്ടത്. കോവിഡ് മഹാമാരി പ്രതിസന്ധി സൃഷ്ടിച്ചെങ്കിലും മൂന്ന് വര്ഷത്തിനുള്ളില് പൂര്ത്തിയാക്കി. ടൂറിസ്റ്റ് ഫെസിലിറ്റേഷന് സെന്റര്, വേദ കേന്ദ്രം, മുമുക്ഷു ഭവന്, ഭോഗ്ശാല, സിറ്റി മ്യൂസിയം, വ്യൂവിങ് ഗാലറി, ഫുഡ്കോര്ട്ട് തുടങ്ങി 23 കെട്ടിടങ്ങള് പദ്ധതിയുടെ ഭാഗമായി ഉള്പ്പെടുന്നു.
