കൊച്ചി: വിശ്വാസികള്ക്ക് ഞായറാഴ്ചകളില് ആരാധനയില് പങ്കുകൊള്ളാന് സാഹചര്യം സൃഷ്ടിക്കണമെന്ന് കേരള കത്തോലിക്ക മെത്രാന് സമിതി(കെസിബിസി) പ്രസിഡന്റ് കര്ദ്ദിനാള് മാര് ജോര്ജ്ജ് ആലഞ്ചേരി. ഈ ആവശ്യമുന്നയിച്ച് അദ്ദേഹം മുഖ്യമന്ത്രിക്ക് കത്ത് അയച്ചു. സര്ക്കാറിന്റെ കോവിഡ് പ്രതിരോധ പ്രവര്ത്തനങ്ങള്ക്ക് കേരള കത്തോലിക്കാസഭയുടെ പിന്തുണ നേരത്തെ തന്നെ നല്കിയിരുന്നതുപോലെ തുടര്ന്നും നല്കുന്നതില് തങ്ങള് പ്രതിജ്ഞാബദ്ധരാണ്. എന്നാല് സര്ക്കാര് ഞായറാഴ്ച മാത്രം ലോക്ഡൗണിനു സമാനമായ നിയന്ത്രണങ്ങള് കര്ശനമാക്കുന്നതുവഴി ക്രൈസ്തവരുടെ ആരാധനാ അവകാശങ്ങള് ഹനിക്കപ്പെടുന്നു. സഭയുടെ പള്ളികള് ആവശ്യമായ വലിപ്പമുള്ളവയായതുകൊണ്ട് പള്ളികളുടെ സ്ഥലസൗകര്യമനുസരിച്ച് കൊവിഡ് പ്രോട്ടോകോള് പാലിച്ചുകൊണ്ട് വിശ്വാസികള്ക്ക് ആരാധനയില് പങ്കുകൊള്ളാന് സാഹചര്യം സൃഷ്ടിക്കണമെന്നും കര്ദിനാള് മാര് ജോര്ജ് ആലഞ്ചേരി മുഖ്യമന്ത്രിക്ക് അയച്ച കത്തില് ആവശ്യപ്പെട്ടു.
