തിരുവനന്തപുരം : കേരളത്തിന്റെ പുതിയ മുഖ്യമന്ത്രിയെ സംബന്ധിച്ച ഔദ്യോഗിക പ്രഖ്യാപനം ഇന്ന് തന്നെ ഉണ്ടാകുമെന്ന് കെപിസിസി അധ്യക്ഷൻ സണ്ണി ജോസഫ് അറിയിച്ചു. ഇതുമായി ബന്ധപ്പെട്ട നിർണ്ണായക ചർച്ചകൾ പൂർത്തിയായതായും ഹൈക്കമാൻഡിന്റെ തീരുമാനത്തിനായി കാത്തിരിക്കുകയാണെന്നും അദ്ദേഹം മാധ്യമങ്ങളോട് പറഞ്ഞു. മുഖ്യമന്ത്രി ആരാണെന്ന കാര്യത്തിൽ ഇന്ന് തന്നെ തീരുമാനമുണ്ടാകുമെന്നാണ് പ്രതീക്ഷിക്കുന്നത്. സോണിയ ഗാന്ധി ആശുപത്രിയിലായതിനാലാണ് പ്രഖ്യാപനത്തിൽ നേരിയ താമസം നേരിട്ടതെന്ന് സണ്ണി ജോസഫ് വ്യക്തമാക്കി.
വരാനിരിക്കുന്ന മന്ത്രിസഭയിൽ കണ്ണൂരിൽ നിന്നുള്ള പ്രതിനിധിയായി സണ്ണി ജോസഫ് അംഗമാകുമെന്നാണ് സൂചന. സുപ്രധാനമായ വകുപ്പുകൾ തന്നെ അദ്ദേഹത്തിന് ലഭിച്ചേക്കും. സണ്ണി ജോസഫ് മന്ത്രിയാകുന്നതോടെ കെപിസിസി അധ്യക്ഷ സ്ഥാനത്തേക്ക് പുതിയൊരാൾ വരുമെന്നും ഉറപ്പായിട്ടുണ്ട്. മുഖ്യമന്ത്രിയെ നിശ്ചയിക്കുന്നത് വൈകുന്നത് ജനങ്ങൾക്കിടയിൽ വലിയ ചർച്ചകൾക്കും വികാരപ്രകടനങ്ങൾക്കും കാരണമാകുന്നുണ്ട്. അതിനാൽ ഇനിയും തീരുമാനം നീട്ടിക്കൊണ്ടുപോകാൻ കഴിയില്ലെന്നാണ് നേതൃത്വത്തിന്റെ വിലയിരുത്തൽ.
