കോഴിക്കോട്: പെറ്റികേസെടുത്ത് വിടേണ്ടവരെ പോലീസ് സ്റ്റേഷനിലേക്ക് വിളിപ്പിച്ച് അപമാനിക്കരുതെന്ന് മനുഷ്യാവകാശ കമ്മീഷന്. ഇത്തരം കേസുകളില് അനാവശ്യ ഇടപെടലുകള് നടത്തി വ്യക്തികളുടെ ആത്മാഭിമാനത്തെയും സഞ്ചാരസ്വാതന്ത്ര്യത്തെ ഹനിക്കുകയും മനുഷ്യാവകാശങ്ങള് ലംഘിക്കുകയും ചെയ്യുന്ന സംഭവങ്ങള് ആവര്ത്തിക്കാതിരിക്കാന് പോലീസ് സേനാംഗങ്ങള്ക്ക് സംസ്ഥാന പോലീസ് മേധാവി കര്ശന നിര്ദ്ദേശം നല്കണമെന്ന് മനുഷ്യാവകാശ കമ്മീഷന് ഉത്തരവിട്ടു.
ഗതാഗത നിയമം ലംഘിച്ചതിന് പോലീസ് സ്റ്റേഷനില് ചെന്ന് പിഴയടക്കാന് നിര്ദ്ദേശിച്ചതിന്റെ ഫലമായി യുവാവിന് പി. എസ്. സി. പരീക്ഷയെഴുതാന് സാധിക്കാത്ത സംഭവത്തില് പത്രവാര്ത്തയുടെ അടിസ്ഥാനത്തില് കമ്മീഷന് സ്വമേധയാ രജിസ്റ്റര് ചെയ്ത കേസിലാണ് ജുഡീഷ്യല് അംഗം കെ. ബൈജുനാഥിന്റെ ഉത്തരവ്. സംഭവത്തില് ഫറോക്ക് പോലീസ് സ്റ്റേഷനിലെ സീനിയര് സിവില് പോലീസ് ഓഫീസര് രഞ്ജിത്ത് പ്രസാദിന്റെ ഭാഗത്ത് വീഴ്ച സംഭവിച്ചതായി കമ്മീഷന് ഉത്തരവില് പറഞ്ഞു. ഉദ്യോഗസ്ഥന്റെ അനഭിലഷണീയമായ പ്രവൃത്തി കാരണം പോലീസ് സേനയുടെ സല്പ്പേരിന് കളങ്കം സംഭവിച്ചിട്ടുണ്ടെന്നും കമ്മീഷന് നിരീക്ഷിച്ചു.