തിരുവനന്തപുരം : സംസ്ഥാനത്ത് സിക്ക പ്രതിരോധം ശക്തമാക്കാന് ആരോഗ്യ, തദ്ദേശ സ്വയംഭരണ വകുപ്പുകള് ഏകോപിപ്പിച്ച് പ്രവര്ത്തിക്കുമെന്ന് ആരോഗ്യമന്ത്രി വീണ ജോര്ജ്. നിലവില് എട്ട് പേരാണ് സിക്ക ബാധിച്ച് ചികിത്സയിലുള്ളത്. അതില് മൂന്ന് പേര് ഗര്ഭിണികളാണ്. സിക്ക വൈറസ് വ്യാപനം നേരിടാന് 7 ദിവസത്തെ ആക്ഷന് പ്ലാന് തീരുമാനിച്ചിട്ടുണ്ടെന്നും ആരോഗ്യമന്ത്രി അറിയിച്ചു. അതേസമയം സംസ്ഥാനത്ത് ഡെങ്കിപ്പനി വ്യാപനത്തിന് സാധ്യതയുണ്ടെന്ന് മന്ത്രി മുന്നറിയിപ്പ് നല്കി. സിക്ക സാഹചര്യം ചര്ച്ചചെയ്ത യോഗത്തിന് ശേഷമാണ് മാധ്യമങ്ങളോട് സംസാരിക്കുകയായിരുന്നു മന്ത്രി.
സംസ്ഥാനത്ത് സിക്ക വൈറസ് രോഗികളുടെ എണ്ണം വര്ധിക്കുന്ന സാഹചര്യത്തിലാണ് തദ്ദേശസ്വയംഭരണ വകുപ്പ് മന്ത്രി എം.വി ഗോവിന്ദന് മാസ്റ്റര്, ആരോഗ്യ വകുപ്പ് മന്ത്രി വീണാ ജോര്ജ് എന്നിവരുടെ നേതൃത്വത്തില് യോഗം ചേര്ന്നത്. സിക്ക വൈറസ് പ്രതിരോധത്തിന് ആരോഗ്യ വകുപ്പും തദ്ദേശ സ്വയംഭരണ വകുപ്പും ഏകോപിപ്പിച്ചുള്ള പ്രവര്ത്തനങ്ങള് നടത്താന് തീരുമാനമായി. തിരുവനന്തപുരത്ത് മാത്രമല്ല സംസ്ഥാനത്ത് എല്ലായിടത്തും ജാഗ്രത പാലിക്കണമെന്ന് ഉദ്യോഗസ്ഥര്ക്ക് മന്ത്രിമാര് നിര്ദേശം നല്കി.
സിക്ക വൈറസിന് പുറമേ ഡെങ്കിപ്പനിയും റിപ്പോര്ട്ട് ചെയ്യുന്ന സാഹചര്യത്തിലാണ് ഇരു വകുപ്പുകളുടേയും യോഗം വിളിച്ചതെന്ന് മന്ത്രി വീണാ ജോര്ജ് പറഞ്ഞു. തിരുവനന്തപുരത്താണ് രോഗം റിപ്പോര്ട്ട് ചെയ്തതെങ്കിലും എല്ലാ ജില്ലകളും ജാഗ്രത പാലിക്കേണ്ടതാണ്. കൊതുകിന്റെ ഉറവിട നശീകരണ പ്രവര്ത്തനങ്ങള്, ഫോഗിംഗ് എന്നിവയ്ക്ക് പ്രാധാന്യം നല്കണം. ഇതിനുള്ള മരുന്നുകള് ആശുപത്രികള് വഴി തദ്ദേശസ്വയംഭരണ സ്ഥാപനങ്ങള്ക്ക് ലഭ്യമാക്കുന്നതാണ്.