പാലക്കാട്: പാലക്കാട് പല്ലശ്ശനയില് കല്യാണവീട്ടില് ദമ്പതിമാരുടെ തല കൂട്ടി മുട്ടിച്ച സംഭവത്തില് സംസ്ഥാന വനിതാ കമ്മീഷന് സ്വമേധയാ കേസെടുത്തു. സംഭവത്തെ കുറിച്ച് പെട്ടെന്ന് അന്വേഷിച്ച് റിപ്പോര്ട്ട് സമര്പ്പിക്കാന് കൊല്ലങ്കോട് പോലീസിന് വനിതാ കമ്മീഷന് നിര്ദ്ദേശം നല്കി. പല്ലശന സ്വദേശിയായ സച്ചിന്റെ വിവാഹ ശേഷം വധുവിന്റെ ഗൃഹ പ്രവേശന സമയത്താണ് സംഭവം നടന്നത്. സച്ചിന്റെയും നവവധു സജ്ലയുടെയും തല തമ്മില് കൂട്ടിമുട്ടിച്ചത് പിന്നില് നിന്ന അയല്വാസിയായിരുന്നു. അപ്രതീക്ഷിതമായി ബലം പ്രയോഗിച്ച് തലകള് തമ്മില് കൂട്ടിമുട്ടിച്ചപ്പോള് വധുവും വരനും പകച്ചു പോയി. വേദന കൊണ്ട് പുളഞ്ഞ വധു കരഞ്ഞുകൊണ്ടാണ് വരന്റെ വീട്ടിലേക്ക് ആദ്യമായി കയറിപ്പോയത്. സംഭവത്തിന്റെ വീഡിയോ ദൃശ്യങ്ങള് സമൂഹമാധ്യമങ്ങളില് വലിയ തോതില് പ്രചരിച്ചിരുന്നു.
കോഴിക്കോട് മുക്കം സ്വദേശിയാണ് വധുവായ സജ്ല. വിവാഹം കഴിഞ്ഞ് പാലക്കാട് സച്ചിന്ഫെ വീട്ടിലെത്തി നിലവിളക്കെടുത്ത് ഗൃഹപ്രവേശം ചെയ്യുന്ന സമയത്തായിരുന്നു അപ്രതീക്ഷിതമായ തലയ്ക്കിടി. വീട്ടുകാരെ മിസ് ചെയ്ത്, കിളി പോയി ടെന്ഷനായി നില്ക്കുമ്പോഴാണ് ഇടി വരുന്നത്. ഇടിക്കൂന്ന് സ്വപ്നത്തില് പോലും വിചാരിച്ചില്ല. എവിടെയാണ് നില്ക്കുന്നത് പോലും മനസിലാകാത്ത രീതിയിലായിപ്പോയി ഇടി കിട്ടിയ ശേഷമെന്ന് നവവധു പറഞ്ഞു. അയല്വാസി തന്നെയാണ് ആചാരത്തിന്റെ ഭാഗമായുള്ള ഇടി നടപ്പിലാക്കിയത്.
