കൊല്ലം: കരുനാഗപ്പള്ളിയില് കഴിഞ്ഞ ദിവസം കുട്ടിയെ തട്ടിക്കൊണ്ടു പോകാന് ശ്രമം നടത്തിയ നാടോടി സ്ത്രീയുടെ മൊഴി ചെന്നെത്തുന്നത് വന്സംഘങ്ങളിലേയ്ക്ക് . തമിഴ് നാട്ടിലെ പൊള്ളാച്ചിയില് നിന്ന് തന്നെ ലോറിയില് കരുനാഗപ്പള്ളിയിലെത്തിച്ചതാണെന്നും തന്നെ കൂടാതെ മുപ്പതോളം ആളുകളെ മയിലണ്ണന് എന്ന ലോറിഡ്രൈവര് കേരളത്തില് എത്തിച്ചിട്ടുണ്ടെന്നും നാടോടി സ്ത്രീ. ഒരു കുട്ടിയെ കൊണ്ടുവന്നു തന്നാല് പണം തരാമെന്ന് ഡോക്ടര് പറഞ്ഞതായും ഒന്പതു വയസുകാരിയെ തട്ടിക്കൊണ്ടു പോകാന് ശ്രമിച്ച നാടോടി സ്ത്രീ പോലീസിനോട് പറഞ്ഞു.
അനിയത്തിക്കു ബിസ്ക്കറ്റ് വാങ്ങാന് രാവിലെ കടയില് പോയ ഒന്പത് വയസുകാരിയെ തട്ടിക്കൊണ്ടു പോകാന് ശ്രമിക്കുന്നതിനിടെയാണ് ഇവര് പിടിയിലായത്. ഇന്നലെ രാവിലെയാണ് സംഭവം. കരുനാഗപ്പള്ളി തുറയില്ക്കുന്ന് എസ്എന്യുപി സ്കൂളിലെ നാലാം ക്ലാസ് വിദ്യാര്ഥിനിയാണ് ജാസ്മിന്. കുട്ടിയുടെ പിന്നാലെ നടന്നെത്തിയ സ്ത്രീ കൈയില് പിടിക്കുകയും ‘എന്റെ കൂടെ വാ മോളെ, നമുക്കു പോകാം’ എന്നു പറയുകയുമായിരുന്നുവെന്നു കുട്ടി പോലീസിനോട് പറഞ്ഞു. പിടിവിട്ടു കുതറിയോടിയ കുട്ടി അടുത്ത വീട്ടില് അഭയം തേടി. അതിനിടെ കടന്നുകളയാന് ശ്രമിച്ച സ്ത്രീയെ നാട്ടുകാര് തടഞ്ഞുവച്ചു പോലീസില് ഏല്പ്പിക്കുകയായിരുന്നു.
60 വയസ് തോന്നിക്കുന്ന നാടോടി സ്ത്രീ തമിഴും മലയാളവും ഇടകലര്ത്തിയാണു സംസാരിക്കുന്നത്. പരസ്പര വിരുദ്ധമായി സംസാരിക്കുന്ന ഇവര് തന്റെ പേരു ജ്യോതി എന്നാണെന്നും പൊള്ളാച്ചിയാണു സ്വദേശമെന്നും പറയുന്നു. കുട്ടിയുടെ അമ്മയുടെയും അധ്യാപകരുടെയും പരാതിയില് കരുനാഗപ്പള്ളി പോലീസ് അന്വേഷണം ആരംഭിച്ചു. സ്ത്രീ പരസ്പര വിരുദ്ധമായി സംസാരിക്കുന്നതിനാല് അവര്ക്കു മാനസികാസ്വാസ്ഥ്യം ഉണ്ടോയെന്നു പരിശോധിക്കുമെന്നും പോലീസ് പറഞ്ഞു. മെഡിക്കല് റിപ്പോര്ട്ടിന്റെ അടിസ്ഥാനത്തില് ഇവരെ കോടതിയില് ഹാജരാക്കും.