തിരുവനന്തപുരം : ഇ.ഡിക്കുപിന്നാലെ ആദായനികുതി വകുപ്പും കിഫ്ബി പദ്ധതി സംബന്ധിച്ച് അന്വേഷിക്കുന്നു. കിഫ്ബി പദ്ധതിയുടെ വിശദാംശങ്ങള് തേടി ആദായനികുതി വകുപ്പ് നോട്ടീസ് അയച്ചു. കഴിഞ്ഞ അഞ്ച് വര്ഷത്തിനിടെ കിഫ്ബി നടപ്പാക്കിയ പദ്ധതികളുടെ വിശദാംശങ്ങള് സമര്പ്പിക്കാനാണ് നോട്ടീസില് ആവശ്യപ്പെട്ടിരിക്കുന്നത്. നേരത്തെ ഇ.ഡിയും ഇതു സംബന്ധിച്ച് നോട്ടീസ് അയച്ചിരുന്നു.
പദ്ധതിയുടെ വിശദാംശങ്ങള് കൂടാതെ കഴിഞ്ഞ അഞ്ചുവര്ഷത്തിനിടെ കരാറുകാര്ക്ക് നല്കിയിട്ടുള്ള പണത്തിന്റെ വിശദാംശങ്ങള് നല്കണമെന്നും നോട്ടീസില് ആവശ്യപ്പെട്ടിട്ടുണ്ട്. ഓരോ പദ്ധതിക്കും എത്ര നികുതി നല്കിയിട്ടുണ്ട് തുടങ്ങിയ കാര്യങ്ങളും അറിയിക്കാന് ഇന്കം ടാക്സ് അഡിഷണല് കമ്മീഷണര് നല്കിയ കത്തില് ആവശ്യപ്പെട്ടിട്ടുണ്ട്.
നേരത്തെ കിഫ്ബിയിലെ ഉദ്യോഗസ്ഥരെ ചോദ്യംചെയ്യാന് ഇ.ഡി വിളിപ്പിച്ചിരുന്നു. ഇത് വലിയ വിവാദങ്ങള്ക്ക് ഇടയാക്കുകയും ഉദ്യോഗസ്ഥര് ഹാജരാകില്ലെന്ന് നിലപാടെടുക്കുകയും ചെയ്തിരുന്നു. ഇതിനു പിന്നാലെയാണ് മറ്റൊരു കേന്ദ്ര ഏജന്സിയും കിഫ്ബി പദ്ധതികളെക്കുറിച്ച് അന്വേഷണം ആരംഭിച്ചത്.
ആദായ നികുതി വകുപ്പ് ചോദിക്കുന്ന കാര്യങ്ങള്ക്ക് കൃത്യമായ മറുപടി നല്കുമെന്ന് ധനമന്ത്രി ടി.എം. തോമസ് ഐസക് പറഞ്ഞു. മറുപടി നല്കാനാവാത്ത ഒരു കാര്യവും കിഫ്ബിയുമായി ബന്ധപ്പെട്ട് ഇല്ലെന്നും അദ്ദേഹം വ്യക്തമാക്കി.
