തിരുവനന്തപുരം: കിളിമാനൂരില് നിയന്ത്രണം നഷ്ടപ്പെട്ട കാറിടിച്ച് സ്കൂട്ടര് യാത്രക്കാരി മരിച്ച കേസില് ഒരാള് അറസ്റ്റില്. കാറോടിച്ച തിരുവല്ല സ്വദേശി ഗിരീഷ്കുമാറിന്റെ അറസ്റ്റാണ് രേഖപ്പെടുത്തിയത്. കിളിമാനൂര് ഇരട്ടച്ചിറയില് ഇന്നലെയുണ്ടായ വാഹനാപകടത്തില് സ്വകാര്യ സ്കൂള് അധ്യാപികയായ കിളിമാനൂര് സ്വദേശി അജിലയാണ് മരിച്ചത്. എതിരെ വന്ന കാറ് നിയന്ത്രണം നഷ്ടപ്പെട്ട് അജിലയുടെ സ്കൂട്ടറില് ഇടിച്ചാണ് അപകടം. ആശുപത്രിയില് എത്തിക്കുന്നതിന് മുമ്പെ മരിച്ചു. ആറു വയസ്സുള്ള മകന് പരിക്കുകളോടെ ചികിത്സയിലാണ്. കാര് ഡ്രൈവര് ഗിരീഷ്കുമാര് ഉറങ്ങിപോയതാണ് അപകടകാരണമെന്നാണ് പോലീസിന് നല്കിയ മൊഴി. അതേസമയം എം.സി റോഡില് അപകടം പതിവാണെങ്കിലും എംവിഡിയുടെ പ്രവര്ത്തനം കാര്യക്ഷമമല്ല.
സെയിഫ് കോറിഡോര് പദ്ധതിയുടെ ഭാഗമായി നിയോഗിച്ചിരുന്ന സ്പെഷ്യല് സ്ക്വാഡിനെ തിരുവനന്തപുരം നഗരത്തിലെ മറ്റ് പ്രവര്ത്തനങ്ങള്ക്കായി വിനിയോഗിച്ചിരിക്കുകയാണ്. തട്ടത്തുമല മുതല് കഴക്കൂട്ടം വരെ സുരക്ഷിതയാത്ര ഒരുക്കാനായിരുന്നു എം.സി റോഡ് സെയിഫ് കോറിഡോര് പദ്ധതി. ഡീസലടിക്കാന് പണമില്ലാത്തതിനാല് റോഡ് സേഫ്റ്റി അതോറിറ്റി കൈമാറിയ മരാസോ വാഹനവും പരിശോധന നടത്തുന്നില്ല. സ്പെഷ്യല് സ്ക്വാഡിനെ തിരികെ നിയോഗിച്ചാല് അപകടതോതെങ്കിലും കുറക്കാനാകുമെന്നാണ് വിദഗ്ധരുടെ നിഗമനം.
