വടകര : ടി.പി ചന്ദ്രശേഖരന്റെ മൊബൈല്‍ നമ്പര്‍ ഔദ്യോഗിക നമ്പറായി സ്വീകരിച്ചതിന് പിന്നാലെ ഔദ്യോഗിക വാഹനത്തിലും ടി.പിയുടെ ഓര്‍മകളെ നിലനിര്‍ത്തി ഭാര്യയും വടകര എം.എല്‍.എ യുമായ കെ.കെ രമ. എം.എല്‍.എയുടെ ഔദ്യോഗിക വാഹനത്തിന് ടി.പിയുടെ ബൈക്കിന്റെ നമ്പറാണ് നല്‍കിയിരിക്കുന്നത്. ഇത് കാണുമ്പോഴും സി.പി.എമ്മിന് കലിപ്പാകും, പഴയകാര്യങ്ങള്‍ തികട്ടിവരും.
രാഷ്ട്രീയ-സാമൂഹിക രംഗങ്ങളിലെല്ലാം സജീവമായിരുന്ന ടി.പി ചന്ദ്രശേഖരന്റെ ബൈക്കിന്റെ നമ്പറായ KL 18 A 6395 എന്ന നമ്പര്‍ നാട്ടുകാര്‍ക്കെല്ലാം സുപരിചിതമായിരുന്നു. ഈ ബൈക്കില്‍ സഞ്ചരിക്കുമ്പോഴാണ് 2012 മേയ് നാലിന് രാത്രി ടി.പിയെ ഇടിച്ചുവീഴ്ത്തി വെട്ടിക്കൊല്ലുന്നത്.
കെ.കെ. രമ എം.എല്‍.എയുടെ വാഹനത്തിന് KL 18 AA 6395 എന്ന നമ്പറാണ് ലഭിച്ചിരിക്കുന്നത്. ഈ നമ്പറിനായി നേരത്തെ തന്നെ മോട്ടോര്‍ വാഹന വകുപ്പില്‍ അപേക്ഷ നല്‍കിയിരുന്നു. ടി.പിയുടെ മൊബൈല്‍ നമ്പറായിരുന്ന 9447933040 ആണ് രമയുടെ ഔദ്യോഗിക നമ്പറായി ഉപയോഗിക്കുന്നത്. ഏത് ആവശ്യങ്ങള്‍ക്കും സഖാവ് ടി.പിയെ ആളുകള്‍ എങ്ങനെയാണോ ബന്ധപ്പെട്ടിരുന്നത്, ഇനിയും അതുപോലെ ഏത് സമയത്തും ആ നമ്പറില്‍ വിളിക്കാമെന്ന് എം.എല്‍.എ പറഞ്ഞിരുന്നു.
