മലപ്പുറം : കെഎം ഷാജിയെ പാണക്കാട്ടേക്ക് വിളിപ്പിച്ച് ലീഗ് നേതൃത്വം. വിഭാഗീയത സൃഷ്ടിക്കുന്നുവെന്ന ആക്ഷേപം ഉയര്ന്നതിനു പിന്നാലെ കെഎം ഷാജിയെ പാണക്കാട്ടേക്ക് വിളിപ്പിച്ചു. വിവാദ പ്രസംഗങ്ങളില് വിശദീകരണം നല്കണമെന്ന് നേതൃത്വം ആവശ്യപ്പെട്ടു. രാവിലെ പത്തരയ്ക്ക് സാദിഖലി ശിഹാബ് തങ്ങളുടെ വസതിയിലെത്താനാണ് നിര്ദേശം.
പൊതുവേദിയില് പാര്ട്ടിക്കെതിരെ പരോക്ഷമായ വിമര്ശനങ്ങള് ഉന്നയിച്ച കെ എം ഷാജിക്ക് മറുപടിയുമായി മുസ്ലിം ലീഗ് ആക്റ്റിംഗ് ജനറല് സെക്രട്ടറി പി എം എ സലാം നേരത്തെ രംഗത്തെത്തിയിരുന്നു. സങ്കല്പത്തില് ശത്രുവിനെ ഉണ്ടാക്കി അതിനോട് പോരാടുന്നതല്ല യുദ്ധമെന്ന് അദ്ദേഹം പറഞ്ഞു.
അത്തരം പോരാട്ടത്തില് മരിച്ചു വീണാല് ഷഹീദിന്റെ കൂലി കിട്ടുമെന്ന് കരുതേണ്ട. അങ്ങനെ വിചാരിക്കുന്നവര് വിഡ്ഢികളുടെ സ്വര്ഗത്തിലാണെന്നും പി എം എ സലാം വിമര്ശിച്ചു. പോരാളിയുടെ ജീവിതവും സമരവും മരണവും യുദ്ധഭൂമിയില് ആണെന്നായിരുന്നു ഷാജിയുടെ പരാമര്ശം. കഴിഞ്ഞ ദിവസം മലപ്പുറത്ത് ചേര്ന്ന മുസ്ലീം ലീഗ് പ്രവര്ത്തക സമിതി യോഗത്തില് കെ എം ഷാജിക്കെതിരെ നേതാക്കള് രൂക്ഷ വിമര്ശനം ഉന്നയിച്ചിരുന്നു. തെറ്റിദ്ധാരണ സൃഷ്ടിക്കുന്ന തരത്തിലാണ് കെഎം ഷാജി പൊതുവേദികളില് പ്രസംഗിക്കുന്നത്.
ലീഗിനെയും നേതാക്കളെയും അപമാനിക്കുന്ന തരത്തിലും കെഎം ഷാജി പതിവായി പ്രസംഗിക്കുന്നു. ഈ പ്രസംഗം മാധ്യമങ്ങളിലൂടെ പ്രചരിപ്പിക്കുന്നുണ്ടെന്നും എം എ യൂസഫലി അടക്കമുള്ളവരെ അപമാനിക്കാന് ഷാജി ശ്രമിച്ചെന്നും യോഗത്തില് വിമര്ശനം ഉയര്ന്നിരുന്നു.
