കൊച്ചി: സ്ത്രീകള്ക്കും പുരുഷന്മാര്ക്കും പുറമേ ജാതിയുടെ അടിസ്ഥാനത്തില് ബ്രാഹ്മണര്ക്കും വേണ്ടി പ്രത്യേക ശൗചാലയം നിര്മ്മിച്ച ക്ഷേത്ര നടപടി വിവാദത്തില്. കൊച്ചി ദേവസ്വം ബോര്ഡിന്റെ കീഴിലുളള കുറ്റുമുക്ക് ശ്രീ മഹാദേവ ക്ഷേത്രത്തിലാണ് ഇത്തരത്തില് ബ്രാഹ്മണര്ക്കായി പ്രത്യേക ശൗചാലയം നിര്മ്മിച്ചത്. ഇത്തരത്തില് ജാതിപേരിലുളള വിവേചനം സാക്ഷര കേരളത്തിന് അപമാനമാണ് ഉണ്ടാക്കിയിരിക്കുന്നത്. ക്ഷേത്ര നടപടിക്കെതിരെ സമൂഹമാധ്യമങ്ങളില് വലിയ രീതിയില് വിമര്ശനങ്ങളും പരിഹാസവുമാണ് ഉയരുന്നത്. ശക്തമായ രീതിയില് വിമര്ശനങ്ങള് ഉയര്ന്നതിനെ തുടര്ന്ന് ബ്രാഹ്മണര് എന്നെഴുതിയ ബോര്ഡ് നീക്കം ചെയ്തെന്നാണ് സൂചന.
കൊച്ചി ദേവസ്വം ബോര്ഡിന്റെ കീഴിലുളള ക്ഷേത്രത്തിന്റെ ഈ നടപടിക്കെതിരെ ഡിവൈഎഫ്.ഐ വില്വട്ടം മേഖല കമ്മിറ്റി ദേവസ്വം ബോര്ഡിന് പരാതി നല്കുകയും ചെയ്തു. ഡിവൈഎഫ്ഐ യുടെ പരാതി ഇപ്രകാരമാണ്
കൊച്ചിന് ദേവസ്വം ബോര്ഡിന്റെ കീഴിലുളള കുറ്റുമുക്ക് ശ്രീ മഹാദേവ ക്ഷേത്രത്തില് ദേവസ്വം ഭൂമിയില് സ്ഥിതി ചെയ്യുന്ന ക്ഷേത്രക്കുളത്തിന് സമീപമുളള ശൗചാലയങ്ങളില് സ്ത്രീക്കും പുരുഷനും പുറമെ ബ്രാഹ്മണര്ക്ക് പ്രത്യേക ശൗചാലയം ഒരുക്കിയിരിക്കുന്നതായി ശ്രദ്ധയില്പ്പെട്ടു. വേദം പഠിച്ച ഹിന്ദുക്കളെ ജാതിഭേദമന്യേ പൂജാരിയായി ദേവസ്വം പോലും നിയമിക്കുന്ന ഈ കാലത്ത് ബ്രാഹ്മണര്ക്ക് എന്ന രീതിയില് പ്രത്യേകം ശൗചാലയം ഒരുക്കുന്നത് നിലനില്ക്കുന്ന നിയമങ്ങള്ക്കും താല്പര്യങ്ങള്ക്കും എതിരാണ്. ഭരണഘടന ഉയര്ത്തിപ്പിടിക്കുന്ന തുല്യതക്ക് വിരുദ്ധമായതും നാടിന്റെ പ്രബുദ്ധതക്ക് ചേരാത്തതുമാണ്. ഈ വിവേചനം അവസാനിപ്പിക്കാന് നടപടി സ്വീകരിക്കണമെന്നാണ് കൊച്ചിന് ദേവസ്വം ബോര്ഡിന് ഡിവൈഎഫ്ഐ നല്കിയ പരാതി.