കോഴിക്കോട് : കോടഞ്ചേരി ചാലിപ്പുഴയില് ഒഴുക്കില്പ്പെട്ട് കാണാതായ യുവതിയുടെ മൃതദേഹം കണ്ടെത്തി. പെരുമണ്ണ പുതിയോട്ടില് ഇര്ഷാദിന്റെ ഭാര്യ ആയിഷ നിഷില (21)യുടെ മൃതദേഹമാണ് കണ്ടെത്തിയത്. കിണാശ്ശേരി സ്വദേശി അന്സാര് മുഹമ്മദി(26)നായി തെരച്ചില് തുടരുകയാണ്.
സുഹൃത്തുക്കളായ ഇര്ഷാദ്, ഭാര്യ ആയിഷ നിഷില, അന്സാര്, അജ്മല് എന്നിവര് രണ്ട് ബൈക്കുകളിലായാണ് സ്ഥലത്തെത്തിയത്. വയനാട് കമ്പളക്കാട് പോയി വരുന്ന വഴിക്ക് ആണ് ഇവര് ചാലിപ്പുഴയില് ഇറങ്ങിയത്. ചൂരമുണ്ടയില് ചാലിപ്പുഴയിലെ പുളിഞ്ചോട്ടില് കയത്തിന് സമീപം ഉച്ചകഴിഞ്ഞ് മൂന്ന് മണിക്ക് ശേഷം ഇവര് പുഴയിലെ കല്ലുകളില് ഇരിക്കുന്നതായി സമീപ വാസികള് കണ്ടിരുന്നു. പിന്നീട് പുഴയില് കുളിക്കുന്നതിനിടയില് ശക്തമായ മലവെള്ളപ്പാച്ചിലുണ്ടാവുകയും ഒഴുക്കില്പ്പെടുകയുമായിരുന്നു.
ആയിഷ നിഷിലയും, അന്സാറും ഒഴുക്കില്പ്പെട്ടു. നീന്തി രക്ഷപെട്ട മറ്റ് രണ്ട് പേര് പരിസര വാസികളെ വിവരം അറിയിക്കുകയായിരുന്നു. പിന്നീട് നാട്ടുകാര് വിവരം അറിയിച്ചതിനെ തുടര്ന്ന് കോടഞ്ചേരി പോലീസും മുക്കം ഫയര് ഫോഴ്സും സ്ഥലത്തെത്തി രക്ഷാ പ്രവര്ത്തനം ആരംഭിച്ചു. പുഴയില് ശക്തമായ നീരൊഴുക്കാണെന്ന് പരിസരവാസികള് പറയുന്നത്.
കോടഞ്ചേരി പോലീസും മുക്കം ഫയര് ഫോഴ്സും സിവില് ഡിഫന്സ് പ്രവര്ത്തകരും നാട്ടുകാരും ചേര്ന്ന് അന്സാര് മുഹമ്മദിനായി തെരച്ചില് തുടരുകയാണ്. ശാന്തസുന്ദരമായി ഒഴുകുന്ന പുഴ കണ്ടു ഇതില് ഇറങ്ങി പെട്ടെന്ന് വരുന്ന മലവെള്ളപ്പാച്ചിലില് അപകടത്തില്പ്പെട്ടവര് നിരവധിയാണ്. വിനോദ സഞ്ചാരത്തിനായി വരുന്നവരെ സമീപവാസികള് വിലക്കാറുണ്ടെങ്കിലും പലരും മുന്നറിയിപ്പ് അവഗണിച്ച് വെള്ളത്തിലിറങ്ങി അപകടം സംഭവിച്ചിട്ടുണ്ട്.
