കോഴിക്കോട് : രണ്ടാം പിണറായി വിജയന്‍ മന്ത്രിസഭയില്‍ ആരോഗ്യ മന്ത്രിയായി വീണാ ജോര്‍ജ്ജ് ചുമതലയേല്‍ക്കാന്‍ മണിക്കൂറുകള്‍ മാത്രം ശേഷിക്കേ, അവര്‍ക്കെതിരെ ഒന്‍പത് വര്‍ഷം മുമ്പ് മുതിര്‍ന്ന സി.പി.എം നേതാവ് കോടിയേരി ബാലകൃഷ്ണന്‍ ഫേസ്ബുക്കില്‍ പങ്കുവെച്ച പോസ്റ്റ് കുത്തിപ്പൊക്കി നെറ്റിസണ്‍സ്. അന്ന് സി.പി.എമ്മിന്റെ യുവജന സംഘടനയായ ഡി.വൈ.എഫ്.ഐ പുറത്തിറക്കിയ പോസ്റ്ററില്‍ ‘പിതൃശൂന്യര്‍’ എന്ന് വിശേഷിപ്പിച്ചവരില്‍ വീണ ജോര്‍ജ്ജും. ഈ പോസ്റ്റര്‍ പങ്കുവെച്ചുള്ള കോടിയേരിയുടെ എഫ്.ബി പോസ്റ്റാണ് ഇപ്പോള്‍ വ്യാപകമായി പ്രചരിക്കുന്നത്.
2012 ജൂലൈ 29ലേതാണ് പോസ്റ്റ്. ക്യാപ്റ്റന്‍ ലക്ഷ്മിയുടെ മരണവാര്‍ത്തയുമായി ബന്ധപ്പെട്ട് ഇന്ത്യവിഷന്‍ ചാനല്‍ സംപ്രേഷണം ചെയ്ത ഒരു ചിത്രത്തെ ചൊല്ലി ഉയര്‍ന്ന വിവാദത്തിന്റെ പശ്ചാത്തലത്തിലായിരുന്നു ഇത്. ക്യാപ്റ്റന്‍ ലക്ഷ്മിക്ക് വിട ചൊല്ലി ഇന്ത്യവിഷന്‍ നല്‍കിയ പോസ്റ്ററിലെ ഫോട്ടോയില്‍ അവരുടെ തൊപ്പിയില്‍ സി.പി.എം എന്നെഴുതിയത് മായ്ച്ചുകളഞ്ഞു എന്നാണ് വിവാദമുയര്‍ന്നത്. ഇതിനെ വിമര്‍ശിച്ച്‌ ഡി.വൈ.എഫ്.ഐ ‘പിതൃശൂന്യര്‍’ എന്ന തലക്കെട്ടില്‍ പങ്കുവെച്ച പോസ്റ്ററില്‍ അന്ന് ഇന്ത്യ വിഷനില്‍ മാധ്യമപ്രവര്‍ത്തക ആയിരുന്ന വീണ ജോര്‍ജിന്റെ ചിത്രവും ഉള്‍പ്പെട്ടിട്ടുണ്ട്. ‘ഇത്രയും വേണോ സി.പി.എം വിരോധം. സഖാവ് ക്യാപ്റ്റന്‍ ലക്ഷ്മിയുടെ തൊപ്പിയിലെ സി.പി.എം എന്നെഴുതിയത് കമ്പ്യൂട്ടറില്‍ മായ്ച് കളഞ്ഞിരിക്കുന്നു. ലജ്ജാവഹം’ എന്നായിരുന്നു പോസ്റ്ററിലെ വാചകങ്ങള്‍. വീണാ ജോര്‍ജിനൊപ്പം അന്നത്തെ സഹപ്രവര്‍ത്തകരായ എം.പി. ബഷീര്‍, സനീഷ് ഇളയടത്ത് എന്നിവരുടെ ചിത്രങ്ങളും ചേര്‍ത്തിരുന്നു.
ഈ പോസ്റ്ററാണ് കോടിയേരി ബാലകൃഷ്ണന്‍ ഫേസ്ബുക്കില്‍ പങ്കുവെച്ചത്. ന്യൂസ്റൂമിലെ കാപട്യങ്ങള്‍ക്ക് രക്തസാക്ഷികളുടെ പിന്മുറക്കാര്‍ മറുപടി ചോദിക്കുമെന്നും അന്ന് നിഷ്പക്ഷ മാധ്യമ ധര്‍മ്മത്തെപ്പറ്റി ചാരിത്ര്യ പ്രസംഗം നടത്തിയാല്‍ മാപ്പ് കിട്ടില്ലെന്നുമാണ് കോടിയേരി എഴുതിയത്. എന്നിട്ട് അതേ ആള്‍ക്ക് മന്ത്രിസ്ഥാനം നല്‍കേണ്ടി വന്നതിനെ കളിയാക്കിയാണ് എഫ്.ബി പോസ്റ്റിന്റെ സ്ക്രീന്‍ ഷോട്ടുകള്‍ വ്യാപകമായി പ്രചരിക്കുന്നത്.
കോടിയേരി ബാലകൃഷ്ണന്റെ എഫ്.ബി പോസ്റ്റിന്റെ പൂര്‍ണരൂപം-
നിങ്ങള്‍ തുടച്ചുമാറ്റാന്‍ ശ്രമിക്കുന്നതെന്തെന്ന് ഇപ്പോള്‍ വ്യക്തമായി. തൊപ്പിയിലെ ചിഹ്നങ്ങള്‍ നിങ്ങള്‍ക്ക് മായ്ക്കാന്‍ കഴിയും. പക്ഷേ ഞങ്ങളുടെ കൊടി ചുവന്നത് രക്തം കൊണ്ടാണ്. രക്തത്തില്‍ അലിഞ്ഞുചേര്‍ന്നത് കമ്യൂണിസവും. ഓര്‍ത്താല്‍ നന്ന്. ന്യൂസ്റൂമിലെ കാപട്യങ്ങള്‍ക്ക് മറുപടി രക്തസാക്ഷികളുടെ പിന്മുറക്കാര്‍ ഞങ്ങള്‍ ചോദിക്കുക തന്നെ ചെയ്യും. അന്ന് നിഷ്പക്ഷ മാധ്യമ ധര്‍മ്മത്തെ പറ്റി ചാരിത്ര്യ പ്രസംഗം നടത്തരുത്. മാപ്പ് കിട്ടില്ല.
