കോന്നി: കൊക്കാത്തോട് കാട്ടാത്തി ഉന്നതിയിലെ ആദിവാസി മൂപ്പന് മോഹന്ദാസിനെ കാണാതായ സംഭവത്തില് കോന്നി മുന് സര്ക്കിള് ഇന്സ്പെക്ടര്ക്കെതിരെ രൂക്ഷ വിമര്ശനവുമായി കോന്നി എം.എല്.എ അഡ്വ.കെ.യു. ജനീഷ് കുമാര്. 2023 ല് മൂപ്പന് എതിരെ ഉയര്ന്ന പരാതി കോന്നി പോലീസ് സ്റ്റേഷനില് വെച്ച് മെമ്പറുടെ സാന്നിധ്യത്തില് ഒത്തുതീര്പ്പാക്കിയിരുന്നു. എന്നാല് പോലീസ് വിശ്വാസവഞ്ചന കാട്ടിക്കൊണ്ട് കേസ് കോടതിയിലേക്ക് വിടുകയായിരുന്നു. തുടര്ന്ന് കഴിഞ്ഞദിവസം കോടതിയില് നിന്നും സമന്സ് വന്നിരുന്നു. ഇതിന്റെ മനോവിഷമത്തിലാണ് ഇദ്ദേഹം കാട് കയറിയതെന്നാണ് കുടുംബം ആരോപിക്കുന്നത്. മോഹന്ദാസിന്റെ കുടുംബത്തെ നേരില് കണ്ട് സംസാരിച്ചതിന് ശേഷമാണ് അടിയന്തിര ഇടപെടലുകളിലേക്ക് കടക്കുമെന്ന് കോന്നി എം.എല്.എ വ്യക്തമാക്കിയത്.
വനത്തിനുള്ളില് ഊരുമൂപ്പനായി തെരച്ചില് ശക്തമാക്കാന് വനം വകുപ്പ്, ട്രൈബല് വകുപ്പ്, പോലീസ് എന്നിവരുടെ സംയുക്ത സംഘത്തെ നിയോഗിക്കാന് പത്തനംതിട്ട ജില്ലാ കളക്ടറോട് ആവശ്യപ്പെടും. പരിശോധനകള് നടത്തുവാന് ഡ്രോണ് സംവിധാനങ്ങള് എത്തിക്കാന് ശ്രമിക്കും. പോലീസ് കൈക്കൂലി വാങ്ങി എന്ന ആരോപണം അതീവ ഗൗരവമുള്ളതാണ്. ഇതില് വിശദമായ അന്വേഷണം ഉണ്ടാകണം. വാര്ഡ് മെമ്പറോടും ഊരുമൂപ്പനോടും കോന്നി മുന് സി.ഐ മോശമായി പെരുമാറിയ സംഭവത്തില് സംസ്ഥാന ആഭ്യന്തര മന്ത്രി രമേശ് ചെന്നിത്തലയ്ക്ക് പരാതി നല്കുമെന്നും മോഹന്ദാസിനെ കണ്ടെത്താന് ശക്തമായ അന്വേഷണം ഉറപ്പാക്കുമെന്നും എം.എല്.എ പറഞ്ഞു.
