തിരൂർ : കൊളാടി ഗോവിന്ദൻകുട്ടി സ്മാരക പുരസ്കാരം എം.ടി വാസുദേവൻ നായർക്ക് സമർപ്പിച്ചു. യുവകലാസാഹിതി ഏർപ്പെടുത്തിയ പുരസ്കാരം തിരൂർ തുഞ്ചൻപറമ്പിൽ നടന്ന ചടങ്ങിൽ യുവകലാസാഹിതി സംസ്ഥാന പ്രസിഡന്റും കവിയുമായ ആലങ്കോട് ലീലാകൃഷ്ണനാണ് എം.ടി.യ്ക്ക് നൽകിയത്. കേരളത്തിൽ ഉദ്ബുദ്ധതയ്ക്കുവേണ്ടി ജീവിതം മാറ്റിവെച്ച മാതൃകാപുരുഷനാണ് കൊളാടി ഗോവിന്ദൻകുട്ടിയെന്ന് എം.ടി വാസുദേവൻ നായർ പറഞ്ഞു.
ഒരു ദേശത്തിന്റെ ചരിത്രം ജനങ്ങൾക്കു മുൻപിലെത്തിക്കാൻ കൊളാടി ഗോവിന്ദൻകുട്ടിയുടെ എന്തുകൊണ്ട് വന്നേരി എന്ന ദേശചരിത്രപഠനത്തിനു കഴിഞ്ഞു. രാഷ്ട്രീയത്തിലേക്കു തിരിഞ്ഞതിനാലാണ് അദ്ദേഹത്തിന് എഴുത്തിൽ കൂടുതൽ ശ്രദ്ധിക്കാൻ കഴിയാതെപോയത്. സി.പി.ഐ. സംസ്ഥാന നിർവാഹകസമിതി അംഗം പി.പി സുനീർ അധ്യക്ഷതവഹിച്ചു. സി.പി.ഐ ജില്ലാ സെക്രട്ടറി പി.കെ കൃഷ്ണദാസ്, അജിത് കൊളാടി, യുവകലാസാഹിതി സംസ്ഥാന ജനറൽസെക്രട്ടറി ഇ.എം. സതീശൻ എന്നിവർ പ്രസംഗിച്ചു.
