കോന്നി : കോന്നി പൂങ്കാവ് റോഡിൽ തെങ്ങുംകാവിൽ വളവിൽ ഓടക്ക് മുകളിൽ സ്ലാബ് സ്ഥാപിക്കാത്തത് അപകട കെണിയാകുന്നു. ബി എം ആൻഡ് ബിസി സങ്കേതിക വിദ്യയിൽ നിർമ്മിച്ച റോഡിൽ തെങ്ങുംകാവ് ഭാഗത്തെ വലിയ വളവിൽ ആണ് ഓട സ്ഥാപിക്കാത്തത്. വളവ് തിരിഞ്ഞ് വരുന്ന വാഹനങ്ങൾ ഓടയിൽ വീണ് അപകടം സംഭവിക്കുന്നതിന് സാധ്യത ഏറെയാണ്. എന്നാൽ റോഡ് നിർമ്മാണം നടന്ന് മാസങ്ങൾ കഴിഞ്ഞിട്ടും ഈ ഭാഗത്ത് ഓടക്ക് സ്ലാബ് സ്ഥാപിച്ചിട്ടില്ല.
പൂങ്കാവ്,പത്തനംതിട്ട, വാഴമുട്ടം, വള്ളിക്കോട്, ചന്ദനപ്പള്ളി തുടങ്ങി ഒട്ടേറെ സ്ഥലങ്ങളിലേക്ക് പോകുന്നപ്രധാന റോഡാണ് ഇത്.കാൽ നട യാത്രക്കാർക്കും ഓടയില്ലാത്തത് ഭീഷണി ഉയർത്തുന്നുണ്ട്. സമീപത്തെ സ്കൂളിലേക്കും ആരാധനാലയത്തിലേക്കും പോകുന്ന കൊച്ചു കുട്ടികളും പ്രായമായ ആളുകളും ഉൾപ്പെടെ ഇതുവഴി ആണ് സഞ്ചരിക്കുന്നത്. ഇരു ചക്ര വാഹന യാത്രക്കാരും ഇവിടെ അപകടത്തിൽ പെടുന്നതിന് സാധ്യത ഏറെയാണ്.ഇതേ റോഡിൽ മറ്റ് പലയിടത്തും ഓടക്ക് സ്ലാബ് സ്ഥാപിച്ചിട്ടുമുണ്ട്. വിഷയത്തിൽ നാട്ടുകാരുടെ പ്രതിഷേധം ശക്തമാണ്.
