കോന്നി: കോന്നിയുടെ സമ്പന്നമായ സാംസ്കാരിക പൈതൃകവും കലാ–കായിക ശേഷികളും ജനങ്ങളിലേക്ക് എത്തിക്കുക എന്ന ലക്ഷ്യത്തോടെ കോന്നി കൾച്ചറൽ ഫോറം സംഘടിപ്പിക്കുന്ന കോന്നി ഫെസ്റ്റ് നാളെ ആരംഭിക്കും. 2026 ജനുവരി 4 വരെ നീളുന്ന ഫെസ്റ്റിവൽ കോന്നിയെ കലാ–സാംസ്കാരിക -ഉത്സവ വേദിയാക്കി മാറ്റും.
ഉദ്ഘാടന ദിനമായ നാളെ വൈകിട്ട് 5:30 ന് കോന്നി കൾച്ചറൽ ഫോറം ചെയർമാൻ റോബിൻ പീറ്റർ അധ്യക്ഷനാകുന്ന സമ്മേളനം അടൂർ പ്രകാശ് എം.പി. ഉദ്ഘാടനം ചെയ്യും. തുടർന്ന് നടക്കുന്ന ചെണ്ടമേളം ഫ്യൂഷൻ കലാപരിപാടികൾക്ക് ഔപചാരിക തുടക്കം കുറിക്കും. കലാസന്ധ്യയിൽ മഴവിൽ മനോരമ ‘മറിമായം’ അളിയൻസ് ഫെയിം റിയാസ് നർമ്മകല മുഖ്യാതിഥിയായിരിക്കും. തുടർന്ന് കൈകൊട്ടിക്കളി, നൃത്തസന്ധ്യ, നാടൻ കലാരൂപങ്ങളുടെ ദൃശ്യാവിഷ്കരണമായ ‘ആട്ടക്കളം’ ഉൾപ്പെടെ വിവിധ കലാപരിപാടികൾ അരങ്ങേറും.
ഫെസ്റ്റിന്റെ ഭാഗമായി വിവിധ ദിവസങ്ങളിൽ കുട്ടികൾക്കായി സംഗീതം, ചിത്രരചന, നാടോടി നൃത്തം എന്നീ മത്സരങ്ങളും സംഘടിപ്പിച്ചിട്ടുണ്ട്. കോന്നി നിയോജക മണ്ഡലത്തിൽ വിവിധ മേഖലകളിൽ കഴിവ് തെളിയിച്ചവരെ ആദരിക്കുന്നതിന്റെ ഭാഗമായി ഈ ഫെസ്റ്റിൽ ചാരിറ്റബിൾ സൊസൈറ്റീസ് ആക്ട് പ്രകാരം രജിസ്റ്റർ ചെയ്ത ജീവകാരുണ്യ പ്രവർത്തനങ്ങൾ നടത്തുന്ന സംഘടനകളെയും വ്യക്തികളെയും ആദരിക്കും. ചടങ്ങിൽ സൂര്യ കൃഷ്ണ മൂർത്തി മുഖ്യ അഥിതി ആയിരിക്കും.
കുടുംബ സമേതം പങ്കെടുത്ത് കോന്നി ഫെസ്റ്റിനെ വിജയിപ്പിക്കണമെന്ന് സംഘാടക സമിതി അഭ്യർത്ഥിച്ചു.
