കോന്നി: കോന്നിയിലെ ജനങ്ങൾ നല്കിയ അംഗീകാരത്തിന് വിനയത്തോടെ നന്ദി രേഖപ്പെടുത്തുന്നതായി അഡ്വ.കെ.യു.ജനീഷ് കുമാർ പറഞ്ഞു. എൽ.ഡി.എഫ് സർക്കാരിന്റെ പിൻതുണയിൽ കോന്നി നിയോജക മണ്ഡലത്തിൽ 16 മാസക്കാലം വലിയ വികസന പ്രവർത്തനങ്ങൾക്ക് നേതൃത്വം നല്കാൻ കഴിഞ്ഞു. കോന്നിയെ വികസന കുതിപ്പിലേക്ക് നയിക്കാൻ നടത്തിയ പരിശ്രമങ്ങൾക്ക് ജനങ്ങൾ നല്കിയ അംഗീകാരമായാണ് ഈ വിജയത്തെ കാണുന്നത്.
കൂടുതൽ വിനയാന്വിതനായി ജനങ്ങൾക്കു വേണ്ടി തുടർന്നും പ്രവർത്തിക്കും. കോന്നിയെ വികസന നേട്ടങ്ങളിലൂടെ മുന്നോട്ട് നയിക്കും. എല്ലാ ജനപ്രതിനിധികളേയും കക്ഷിരാഷ്ട്രീയാതീതമായി കൂടെ നിർത്തി വികസന പ്രവർത്തനങ്ങൾ മുന്നോട്ടു കൊണ്ടു പോകുമെന്ന് ജനങ്ങൾക്ക് ഉറപ്പു നല്കുന്നുവെന്നും കെ.യു.ജെനീഷ് കുമാര്‍ പറഞ്ഞു. തന്റെ വിജയത്തിനായി അഹോരാത്രം പ്രവർത്തിച്ച എല്ലാ എൽ.ഡി.എഫ് പ്രവർത്തകർക്കും അദ്ദേഹം നന്ദി രേഖപ്പെടുത്തി.
