കോന്നി : ഇന്നത്തെ കാറ്റിലും മഴയിലും മലയോര മേഖലയില്‍ കനത്ത നാശം. മിക്ക സ്ഥലത്തും മരങ്ങളും ചില്ലകളും ഒടിഞ്ഞു വീണ് ഗതാഗതം തടസ്സപ്പെട്ടു. വൈദ്യുതി വിതരണവും തടസ്സപ്പെട്ടിരിക്കുകയാണ്. ഇന്ന് നാലുമണിയോടെയാണ് ശക്തമായ കാറ്റടിച്ചത്. പത്തനംതിട്ടയുടെ മിക്ക പ്രദേശങ്ങളിലും കനത്ത മഴയും ലഭിച്ചു. മഴയോടൊപ്പം ഇടിയും മിന്നലും തുടരെ ഉണ്ടായത് ജനങ്ങളെ ആശങ്കയിലാക്കി.
കോന്നി ചാങ്കൂർ മുക്ക്, ആഞ്ഞിലികുന്ന് എന്നിവിടങ്ങളിലാണ് ഗതാഗത തടസമുണ്ടായത്. ചാങ്കൂർ മുക്കിൽ ആഞ്ഞിലിമരം ഒടിഞ്ഞ് വൈദ്യുത കമ്പിയിൽ തട്ടി നിന്നിരുന്നതിനാൽ വൻ ദുരന്തം ഒഴിവാകുകയായിരുന്നു. മലയോര മേഖലയിൽ വൈദ്യുതി ബന്ധവും തടസപ്പെട്ടു. കോന്നിയിൽ നിന്ന് ഫയർഫോഴ്സ് സംഘം എത്തിയാണ് ഗതാഗതം പുനഃസ്ഥാപിച്ചത്.
