കോന്നി : വാഹന പരിശോധന നടത്തിയതിന്റെ പേരിൽ കോന്നി പോലീസ് സബ് ഇൻസ്പെക്ടർ സാജുവിന് മർദനം. സംഭവത്തിൽ പ്രതിയായ പൂവൻപാറ കോട്ട മുരുപ്പേൽ വീട്ടിൽ മാഹി (27)യെ കോന്നി പോലീസ് റിമാൻഡ് ചെയ്തു. കഴിഞ്ഞ ഇരുപതാം തീയതിയാണ് പോലീസ് വാഹന പരിശോധനയുടെ ഭാഗമായി കോന്നി എസ് ഐ സാജുവിന്റ നേതൃത്വത്തിൽ കോന്നിയിൽ വാഹന പരിശോധന നടത്തിയത്. വാഹന പരിശോധനക്കിടയിൽ മാഹിയുടെ വാഹനവും പരിശോധിക്കുകയും ആവശ്യമായ നടപടികൾ സ്വീകരിക്കുകയും ചെയ്തിരുന്നു.
ഇതിന് ശേഷം കഴിഞ്ഞ ദിവസം രാത്രിയിൽ ഹോട്ടലിൽ ഭക്ഷണം വാങ്ങാൻ എത്തിയ പോലീസ് സബ് ഇൻസ്പെക്ടർ സാജുവിനെ പ്രതി മർദിക്കുകയായിരുന്നു. സംഭവത്തിൽ എസ് ഐയുടെ ശരീരത്തിൽ മുറിവുകൾ ഏറ്റിട്ടുണ്ട്. പ്രതി എസ് ഐ യെ അസഭ്യം പറയുകയും ചെയ്തു.കഴിഞ്ഞ മൂന്ന് തവണ മദ്യപിച്ച് വാഹനം ഓടിച്ചത് അടക്കം ഇയാളുടെ പേരിൽ കേസ് എടുത്തിട്ടുണ്ടെന്ന് കോന്നി പോലീസ് പറഞ്ഞു. പോലീസ് ഡ്യൂട്ടി തടസപ്പെടുത്തിയതിനും മർദിച്ചതിനും അസഭ്യം പറഞ്ഞതിനും അടക്കം പോലീസ് കേസ് രെജിസ്റ്റർ ചെയ്തിട്ടുണ്ട്. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.
