കോതമംഗലം: കോതമംഗലത്തും പരിസര പ്രദേശങ്ങളിലും ഡെങ്കിപ്പനി പടരുന്നു. വാരപ്പെട്ടി, നെല്ലിക്കുഴി, കോതമംഗലം മുനിസിപ്പാലിറ്റി എന്നിവിടങ്ങളിലാണ് ഡെങ്കിപ്പനി പിടിപെട്ടിട്ടുള്ളത്. 13 പേര്ക്ക് ഡെങ്കിപ്പനി പിടിപെട്ടതായിട്ടാണ് ആരോഗ്യ വകുപ്പ് അധികൃതര് അറിയിച്ചത്.
വാരപ്പെട്ടി പഞ്ചായത്തിലെ വിവിധ പ്രദേശങ്ങളില് കഴിഞ്ഞ മാസം 26 പേര്ക്ക് ഡെങ്കിപ്പനി സ്ഥിരീകരിച്ചിരുന്നു. കോവിഡ് പശ്ചാതലത്തില് കാക്കനാട് പബ്ലിക് ഹെല്ത്ത് ലാബില് ഡെങ്കിപ്പനി പരിശോധന സാധ്യമല്ലാത്തത് മൂലം അതാത് പ്രദേശത്തെ താലൂക്ക് ആശുപത്രി, സാമൂഹിക ആരോഗ്യ കേന്ദ്രങ്ങള് എന്നിവിടങ്ങളില് കാര്ഡ് ടെസ്റ്റിലൂടെയാണ് പരിശോധന നടത്തുന്നത്.
കോതമംഗലത്തെ സ്വകാര്യ ആശുപത്രിയില് രണ്ട് പേര് ഡെങ്കിപ്പനി ചികിത്സയില് കഴിയുന്നുണ്ടെന്നും ആരോഗ്യ വകുപ്പ് അധികൃതര് വ്യക്തമാക്കി. വാരപ്പെടിയില് പ്രതിരോധ പ്രവര്ത്തനത്തിന്റെ ഭാഗമായി രോഗബാധിത പ്രദേശത്ത് ഫോഗിങ്ങും കൊതുക് ഉറവിട നശീകരണവും നടത്തുന്നുണ്ട്.